VOV4.Sêdang - Kơxê hâi lơ 14/5, jâ H’Yim Kdoh, Kăn phŏ hnê ngăn Vi ƀan pơkuâ kong pơlê Dak Lak hiăng mơnhên tối, tung kong pơlê kố hiăng ai tơ’nôm môi ngế nếo ki dương tính SARS CoV-2. Ngế ki kố ai tơdjâk troh ngế ki tamo châi roh má 3052 a Bắc Ninh cho ngoh V.Đ.D, kot mâ hơnăm 1971, tiú ối a a bêng Đạt Hiếu, pơlê kong krâm Ƀuôn Hồ, kong pơlê Dak Lak. Troh hâi lơ 14/5, ngoh D. hiăng tơngê hmân, pâk xo ngăn mơheăm roh má 2 ƀă hiăng hlo dương tính SARS-CoV-2.

Kơpong khăm pơlât mơngế tro tâ pơreăng COVID-19 a kong pơlê Dak Lak

Dế nôkố, Khu ngăn ‘na pơkeăng ƀă khăm pơlât kong pơlê Dak Lak dế thâ tí tăng mơngế ki ai tơdjâk ngế ki kố vâ khoh teăm kâi châ hbrâ mơdât pơreăng COVID-19. Tiah mê, dế nôkố, a kong pơlê Dak Lak hiăng ai 3 ngế tro tâ pơreăng COVID-19. Kơvâ ngăn ‘na pơkeăng dế tơkŭm ăm mơngế klâ ối krê ai dâng 70 ngế, ăm kuăn pơlê klâ ối krê xêh a hngêi ai lối 1 rơpâu 500 ngế.

Nhat Lisa tơplôu ƀă tơbleăng