VOV4.Sêdang - Tiô Khu hnê mơhno hbrâ mơdât pơreăng COVID 19 kong pơlê Dak Lak, tung hâi lơ 6/8, lâp kong pơlê châ hlo tơ’nôm 17 ngế tro tâ SARS-CoV2 a 8 tơring, pơlê krâm. Mơdêk tâi tâng kơxô̆ ngế tro tâ pơreăng dêi kong pơlê tâk 347 ngế. Ƀă 6 ngế nếo tro tâ tung môi hâi ki mê, troh nôkố, tơring Krông Bông hiăng ai 53 ngế ƀă chiâng tơring ai kơxô̆ ngế tro tâ COVID 19 hên má péa dêi kong pơlê. Čư Kuin xuân cho tơring ai kơxô̆ ngế tro tâ hên má môi, ai 66 ngế.

Hngêi pơkeăng pơlât kơ-o êi xôu Dak Lak pơcháu hlá mơ-éa lo ing hngêi pơkeăng ăm ngế ki tá pơreăng má 51261

Tung kơxô̆ 17 ngế nếo tro tâ châ hlo tung hâi kố, ai 3 ngế cho F1 dêi mâu ngế tro tâ pơreăng châ hlo hdrối mê. 14 ngế ki ê châ hlo tâ tú tung pơlê pơla, ai tro tâ pơreăng ing Pơlê kong kân Hồ Chí Minh ƀă kong pơlê Bình Dương. Rơtế a hâi mê, kơvâ khăm pơlât kong pơlê Dak Lak hiăng diâp ăm mơ-éa lo hngêi pơkeăng ăm ngế kơdrâi, ngế tro tâ pơreăng kơxô̆ 51.261 a ƀuôn Nắc, cheăm Ea Bông, tơring Krông Ana. Tiah mê, kong pơlê Dak Lak hiăng ai 8 ngế tro tâ Covid 19 prêi lĕm ƀă châ lo hngêi pơkeăng.

A Sa Ly tơplôu ƀă tơbleăng