VOV4.Sêdang - Hâi lơ 11/8, kong pơlê Dak Lak châ hlo tơ’nôm 18 ngế tro tâ COVID 19 mơdêk tâi tâng kơxô̆ mơngế tro tâ tung kong pơlê tâk 464 ngế. Tung kơxô̆ 18 ngế nếo tro tâ COVID 19 a Dak Lak, tơring Krông Bông ai hên má môi ai 7 ngế, pơtối mê cho tơring Krông Pač ai 5 ngế. Tâi tâng mâu ngế nếo tro tâ pơrá tâ tú ing mâu ngế ki tro tâ hdrối.

Dak Lak: Tơ’nôm 18 ngế tro tâ COVID 19

Pơreăng COVID 19 a Dak Lak dế hlo tâ tú rĕng a mâu kơpong hơngế hơngo, tíu tơdroăng hbrâ mơdât pơreăng ối tơngôu, klâ kơtăn pơlê pơla ôh tá kơtăn, mâu ngế vêh ing kơpong ai pơreăng pêi pro klâ kơtăn ôh tá tơniăn tiô pơkâ.

Xuân tung hâi lơ 11/8, ai 24 ngế tro tâ COVID 19 a Dak Lak châ lo hngêi pơkeăng hiăng prêi lĕm, mơdêk kơxô̆ mơngế tro tâ pơreăng prêi lĕm ƀă châ lo hngêi pơkeăng a kong pơlê tâk 54 ngế. Tiah mê, kong pơlê Dak Lak troh nôkố u ối 409 ngế dế pơlât, tung tâi tâng kơxô̆ 464 ngế tro tâ COVID 19.

A Sa Ly tơplôu ƀă tơbleăng