VOV4.Sêdang - Riân troh 16 chôu hâi lơ 30/7, kong pơlê Dak Lak ai 204 ngế tâ COVID-19, tâk 19 ngế tâng vâ pơchông ƀă hâi hdrối mê. Tiô tơdroăng ăm ‘nâi sap ing Khu hnê mơhno cheăng hbrâ mơ’dât pơreăng COVID-19 kong pơlê Dak Lak, 19 ngế tâ ki nếo châ ‘nâi a 7 tơring, pơlê kong kơdrâm. Tung mê, pơlê kong kơdrâm Ƀuôn Ma Thuột hên má môi ai 5 ngế ƀă mơdêk tâi tâng kơxô̆ ngế tâ a pơlê kong kơdrâm tâk troh 40 ngế, ối má péa tung lâp kong pơlê, klêi kơ’nâi tơring Čư̆ Kuin ƀă 55 ngế tâ pơreăng.

Dak Lak: Tơ’nôm 19 ngế nếo tâ COVID-19 

Mâu ngế tâ ki nếo châ ‘nâi ki hên cho ai pơreăng tơkŏng djâ sap ing Pơlê kong kân Hồ Chí Minh ƀă kong pơlê Bình Dương lơ tâ tú ing mâu tíu ki ai pơreăng hiăng châ ‘nâi hdrối mê. Tiah mê, tâi tâng kơxô̆ ngế tâ COVID-19 ki châ ‘nâi a Dak Lak troh nôkố ai 204 ngế, 7 ngế hiăng pơlât prêi ƀă tá hâi ai ngế ki lâi hlâ.

Katarina Nga tơplôu ƀă tơbleăng