VOV4.Sêdang - Hâi lơ 5/11, Hô̆i đong kong pơlê Dak Lak tơbleăng Pơkâ ‘na tơdroăng ôh tá xo hnoăng liăn hriâm hneăng má 1 hơnăm 2021 – 2022. Pơkâ châ Khu hnê mơhno má môi Hô̆i đong kong pơlê Dak Lak tơbleăng vâ kơdroh pá puât ăm kuăn pơlê drêng tơdjâk dêi pơreăng COVID-19. Pơtối mê, kong pơlê kô ôh tá xo hnoăng liăn hriâm hneăng má 1, hơnăm 2021 – 2022 sap khế 9 troh khế 12/2021 ƀă vâi hdrêng mauh yăo, hok tro râ má pái hngêi trung tơnêi têa, mâu ngế hriâm a mâu tíu hnê hriâm đi đo tiô tơdroăng hnê hriâm phôh thong tung kong pơlê.

Kơxô̆ liăn pêi pro ing kơxô̆ liăn ngân tơnêi têa, xing xoăng kơxô̆ liăn tơ’nôm kơxô̆ liăn mơ’no đi đo hiăng tơdâng ƀă kơxô̆ liăn xo hnoăng hriâm hneăng má 1 hơnăm hriâm 2021 – 2022 ăm mâu tíu hnê hriâm hngêi trung tơnêi têa tiô xing xoăng liăn ngân nôkố. Pơkâ xuân mơhnhôk mâu tíu hnê hriâm mâm non, hnê hriâm phôh thong ki ôh tá xê hngêi trung tơnêi têa ai troăng hơlâ ăm tê kơtê, kơdroh hnoăng liăn hriâm hneăng má 1 hơnăm 2021 – 2022.

A Sa Ly tơplôu ƀă tơbleăng