VOV4.Sêdang - Ôh ta bê têa ôu kâ, hum roh dế pro tơdroăng rêh ối dêi vâ chê 500 rơpŏng kuăn pơlê a cheăm Dak Rla, tơring Dak Mil, kong pơlê Dak Nông trâm hên xahpá. Hên rơpŏng hiăng lăm tăng khu pong têa, ‘no troh dâng 10, thăm nếo luâ 10 rơtuh liăn la xuân ôh tá châ ai têa.

Lối 1 khế kố rơpŏng jâ Trần Thị Bích Phượng rơtế hên rơpŏng a thôn 5, cheăm Dak R’la thế veăng tơlo liăn rêm hâi, rôe rơpâu lit têa vâ xoăng dêi pó xua mâu klôh têa pơrá hiăng xiâ. Jâ Phượng tối ăm ‘nâi, tơdroăng ôh tá bê ôu hum rôh jiếo pro tơdroăng rêh ối vâi krâ tro tơdjâk hên. Rơpŏng ki lâi xuân thế ăm ai mơngế ối a hngêi vâ xo têa.

‘’Kuăn pơlê akố tâi tâng cho ôh tá bê têa ƀă thế lăm rôe têa. Môi hâi ngin rôe têa krúa vâ ôu hum, rôh jiếo tâi 1.500 lit, têa thế rôe tâng ôh tá rôe mê ôh tá ai têa vâ xúa. Ngin pói vâ mâu khu râ kăn pro ti lâi tŏng kum lơ pro ăm ngin tíu hdoăng têa krúa vâ kuăn pơlê ai têa krúa vâ ô hum rôh jiếo vâ kuăn pơlê hmiân tuăn rêh ối’’.

Kuăn pơlê veăng tơlo liăn rôe têa ô hum rôh jiếo

Ôh tá xê to thế rôe têa ô hum rôh jiếo, rơpŏng jâ Phạm Thị Vân, ối a thôn 3, cheăm Dak R’la ối mơ’no chât rơtuh liăn pong klôh têa vâ tăng troăng têa mŏng. Jâ Vân tối ăm ‘nâi, rơpŏng ki lâi mơhúa nếo pong tro troăng têa mŏng ki ê, hên vâi krâ pong châ hrĭng mat xuân ôh tá ai têa.

‘’Kơpong kố chiâ klôh têa trâm hên pá puât. Rơpŏng á hiăng mơ’no 40 rơtuh liăn vâ pong têa klôh tăng troăng têa mŏng laga cho pá puât. Thế péa pái hâi rơpŏng nếo hrik têa châ môi kơthung têa vâ ôu hum rôh jiếo. Nôkố rơpŏng á xuân thế mơ’no liăn rôe kơthung têa vâ xúa rêm hâi’’.

Mâu rơpŏng mơ’no liăn pong têa ti tăng troăng têa mŏng

Môi tiah mê, a thôn 2 dêi cheăm kố nôkố hiăng ai 30 rơpŏng mơ’no liăn pong klôh têa ôu humm, rôh jiếo, mê 28 klôh têa ôh tá ai têa. 3 klôh têa pong châ tơnêi têa mơ’no liăn ing hên hơnăm hdrối, xuân hiăng xiâ tâi tâng.

Tiô séa ngăn dêi Vi ƀan cheăm Dak R’la, lâp cheăm nôkố ai dâng 500 rơpŏng, ƀă lối 1.500 pơ’leăng mâ mơngế dế ôh tá bê têa ôu hum rôh jiếo, ki hên tơkŭm a thôn 2, 3 ƀă 5. Pôa Ngô Quang Vân, Kăn phŏ hnê ngăn Vi ƀan cheăm Dak R’la tối mâu thôn tung cheăm pơrá rơnâk, hơngế kơnhŏng têa. Tơdrêng amê, lâp cheăm bu ai 1 tíu hdoăng têa tơkŭm a thôn 7, xua mê ôh tá bê vâ xing xoăng ăm tâi tâng rơpŏng tung thôn.

‘’Cheăm hiăng mơhnhôk vâi krâ tah lôi tơdroăng pá puât vâ hâ kơdi\ng têa, xúa têa tơtro. ‘Na ton xŏn cheăm Dak R’la xua tơnêi tíu akố vâ pong têa pá ó. Cheăm hiăng pơkâ thế kong pơlê ai troăng pêi ton xŏn cho hrik têa krúa a rơchôa Đu Ri 2 a thôn 5 ƀă pro tíu hrik mơ’no têa pa ro\ng Vi ƀan cheăm vâ mơ’no têa troh mâu thôn’’.

Tơdroăng ôh tá bê têa ôu hum rôh jiếo rơnó tô a cheăm Dak R’la hiăng hên hơnăm kố. Kuăn pơlê xuân môi tiah khu râ kăn pơkuâ cheăm pói vâ mâu khu râ, kơvâ cheăng rĕng tŏng kum liăn vâ pêi pro vâ kuăn pơlê tung thôn ai têa ôu hum rôh jiếo, tôh têa ăm loăng plâi.

Tuấn Anh rah chêh

A Sa Ly tơplôu ƀă tơbleăng