VOV4.Sedang - Khu pơkuâ ngăn pơkeăng ƀă khăm pơlât kong pơlê Dak Nông tối ăm ‘nâi, 13 ngế F1 a Dak Nông kơto tơdrêng tơƀai inâi QH1403 ƀă ngế tro COVID 19 má 3 dêi Dak Lak kơneăng ing tơraih tơƀai Nội Bài troh a tơraih tơƀai Ƀuôn Ma Thuột, hiăng châ kơ koan cheăng djâ klâ kơtăn tơkŭm ƀă klêi kơ’nâi khăm ngăn mê âm tĭnh roh má 1 ƀă COVID 19.

Tung mê, ai 1 ngế F1 hdrối mê hiăng lăm a pơlê kong kân Hồ Chí Minh xuân hiăng châ kơ koan khăm pơlât pơlê kong kân klâ kơtăn, séa ngăn. Drêng tâng tối ‘na ngế tro COVID 19 má 3 dêi Dak Lak cho pôa V.Đ.D to tơƀai ing tơraih tơƀai Nội Bài vêh a tơraih tơƀai Ƀuôn Ma Thuột, mâu kơ koan cheăng a Dak Nông hiăng thâ ti tăng mâu ngế ki prôk ƀă rơtế kơto tơƀai cho 14 ngế ƀă rĕng djâ tâi tâng kơxô̆ F1 kố hlâ kơtăn a tíu krê. Nôkố khu cheăng Dak Nông dế pơtối ti tăng mâu ngế ki prôk ƀă, chêh inâi mâu ngế F2, F3 vâ pêi pro klâ kơtăn tŭm 21 hâi tiô pơkâ.

A Sa Ly tơplôu ƀă tơbleăng