VOV4.Sêdang - Hâi lơ 17/5, Khu ngăn pơkeăng ƀă khăm pơlât kong pơlê Dak Nông ăm ‘nâi 4 ngế ki nhôm tâ pơreăng COVID-19 a pơlê kong kơdrâm Gia Nghĩa pơtối âm tĭnh rôh má 2 ƀă virus SASR-CoV-2. Hdrối mê, klêi kơ’nâi châ ‘nâi tơdroăng tơbleăng ‘na mâu ngế ki tâ pơreăng 3141 dương tĭnh ƀă virus SASR-Cov-2, Tíu xiâm seá ngăn châi tamo kong pơlê Dak Nông hiăng tơbleăng lâp lu ƀă pêi pro séa ngăn ngế ki lăm, vêh sap ing kơpong ai pơreăng a kong pơlê.

Tiô châ ‘nâi tơdroăng, rơpŏng pôa N.Đ.H tung mê ai 4 ngế ối a bêng Nghĩa Đức, pơlê kong kơdrâm Gia Nghĩa hiăng lăm troh a tíu ki ai ngế tâ pơreăng 3141 hiăng a hngêi pơkeăng bêng tối dêi ivá ƀă lăm klâ ối krê. Mâu túa pơreăng klêi kơ’nâi séa ngăn ăm hlo âm tĭnh rôh má 1 a hâi lơ 9/5. Troh nôkố, kơ koan ngăn pơkeăng pơtối xo túa séa ngăn ƀă nôkố hiăng ăm ‘nâi âm tĭnh rôh má 2 ƀă COVID-19. Nôkố, 4 ngế dế pơtối pêi pro tơdroăng klâ ối krê ƀă séa ngăn châ chăn tro pơkâ.

Katarina Nga tơplôu ƀă tơbleăng