VOV4.Sêdang - Tiô Khu râ kăn cheăng xiâm dêi Vi ƀan Măt trâ̆n tơnêi têa kong pơlê Dak Nông, tung inâi apoăng 96 ngế châ tơbleăng tơbriât to pro kăn teăng mâ Hô̆i đong kong pơlê hneăng má IV, hneăng hơnăm 2021 – 2026 ai 36 ngế cho kăn teăng mâ Hô̆i đong kong pơlê hneăng má III; ai 42 ngế cho kơdrâi, 36 ngế hơnăm ối nếo; 21 ngế cho mơngế hdroâng kuăn ngo, 10 ngế ôh tá xê đảng viên, 10 ngế tiô khôp.

Tâi tâng mâu kăn châ tối mê tŭm tơdroăng pơkâ vâ rah xo kăn teăng mâ Hô̆i đong kong pơlê hneăng má IV, hneăng hơnăm 2021 – 2026. Troh nôkố, tâi tâng 96 ngế  tơbriât to pro kăn ôh tá ai hlá đơn xăm tối dêi kuăn pơlê. Tiô pơkâ, klêi kơ’nâi ai inâi mâu kăn tơbriât to pro kăn, Vi ƀan Măt trâ̆n mâu tơring tơkŭm po hneăng hôp trâm mâ kuăn pơlê a tíu rêh ối dêi mâu ngế ki tơbriât to pro kăn. Tâng ngế ki tơbriât to pro kăn ôh tá châ lối 50% phĭu vâ dêi kuăn pơlê mê kô tah lôi tung inâi mâu ngế ki tơbriât to pro kăn.

A Sa Ly tơplôu ƀă tơbleăng