VOV4.Sêdang - Tiô Tíu xiâm mơdât pơreăng kong pơlê Dak Nông, tâi tâng kơxô̆ ngế tro tâ COVID-19 a kong pơlê cho lối 1.000 ngế. Tung kơxô̆ kố hiăng ai 855 ngế prêi lĕm lo hngêi pơkeăng, 7 ngế hlâ. Ki tơtrŏng má môi, a pơlê kong kơdrâm Gia Nghĩa nếo châ hlo 8 ngế tâ tú tung pơlê pơla. Tung mê ai 5 ngế tơdjâk ngế tro tâ pơreăng a Pơlê kong kân Hồ Chí Minh, ƀă 3 ngế cho ngế pêi cheăng a tíu hơdruê karaoke tâ tú ing mơngế kong pơlê Dak Lak.

Khu cheăng hiăng tơkŭm ti tăng, mơnhên 120 F1, tung mê ai 5 ngế test ngăn yương tĭnh ƀă SARS-CoV-2 ƀă kih thuât RT-PCR. Ƀă 3 ngế cho ngế pêi cheăng a tíu hơdruê karaoke tâ tú ing mơngế a kong pơlê Dak Lak, nôkố kơvâ cheăng Dak Nông dế thăm ti tăng mâu ngế ki tơdjâk. Apoăng mơnhên chât tíu a Gia Nghĩa mâu ngế tro tâ pơreăng kố troh rêh ối, tung mê ai mâu ngế pêi cheăng a tíu karaoke, hngêi ăm tơmối kâ koi ối pơtê.

A Sa Ly tơplôu ƀă tơbleăng