VOV4.Sêdang - Pêi pro tơdroăng “Tâi tâng kuăn pơlê veăng hbrâ mơdât COVID 19 ƀă mot lo ôh tá tro luât” a kơpong tíu tơkăng kong, mâu tíu cheăng Mô đô̆i gak kring tíu tơkăng kong dêi kong pơlê Dak Nông hiăng tơrŭm ƀă kong pơlê tơkŭm mơhnhôk, pơtâng tối, mơhnhôk châ lối 1.000 rơpŏng kuăn pơlê rêh ối a kơpong tíu tơkăng kong kĭ tơkêa pêi pro mâu troăng hbrâ mơdât pơreăng COVID 19 ƀă mot lo ôh tá tro luât.

 Rơtế ƀă vâ xêh kĭ tơkêa pêi pro kơtăng mâu troăng hbrâ mơdât pơreăng tiô pơkâ dêi khu râ kăn pơkuâ kong pơlê, drêng châ hlo mơngế mot lo ôh tá tro luât lơ ối kơpong ai pơreăng vêh a pơlê, kuăn pơlê tơbleăng tơdrêng ăm mâu khu râ kăn pơkuâ, khu mô đô̆i gak kring tíu tơkăng kong ‘nâi tơdroăng. Kuăn pơlê khŏm pêi pro “Pái ôh”: Ôh tá lăm, mot ôh tá tro luât; ôh tá kơtôa, kum lăm, mot ôh tá tro luât; ôh tá tơkŭm po djâ tơdah, tối tơbleăng ăm tơdroăng lăm, mot ôh tá tro luât.

A Sa Ly tơplôu ƀă tơbleăng