VOV4.Sêdang - Mâu ngế ki pêt plâi nong a tơring Dak Mil, kong pơlê Dak Nông dế ôh tá tơniăn xua lối hrĭng ha deăng pêt plâi nong hiăng troh rơnó krí la ôh tá ai ngế ki roê. Ƀă mâu kơdrum deăng pêt plâi nong hiăng troh rơnó krí, hiăng ai lối hrĭng tâ̆n plâi nong hiăng tro ok, hvât lôi.

Pôa Phạm Công Văn, a thôn Tân Lập, cheăm Dak Gằn ai vâ chê 2 ha tơnêi pêt plâi nong tŭm hdrê ki vâ tê ngi kong têa ê. Hơnăm nah, sap ing kơdrum ki kố rơpŏng pôa châ liăn tơkâ lối 200 rơtuh. Ƀă hơnăm kố, sap ing apoăng rơnó troh nôkố rơpŏng bu tê châ 100 rơtuh liăn, bê kơxô̆ liăn ki vâ mơdrếo liăn roê phon rơvât, ôh tá châ liăn tơkâ. Tâi tâng mâu plâi nong ki u ối nôkố athế ok hvât lôi.

“Yă tê nôkố chu rơpâ, rơpâ má môi sap ing rôh ki á pêt plâi nong nah troh nôkố. Plâi nong vâ tê ngi kong têa ê ối 3 rơpâu troh 3.500 liăn tung môi kg. Ƀă plâi ki tê tung kơchơ tê bu ối 500 liăn tung môi kg, môi tiah plâi nong pái rơnó ôh tá ai kơbố roê, xuân môi tiah pin hiăng hvât lôi. Hngêi ki lâi ai plâi nong ôh tá lăm tê, ki hên bu ối 500 liăn môi kg riân tiah mê lŭp tá liăn krí. Hên hngêi vâi lôi gá tum tơruih lơ nôkố vâi pro tơkâng plâi nong pái rơnó vâi hvât ok a tơnêi vâ pro phon vi sinh”.

Kơdrum plâi nong dêi jâ Lê Thị Tư ôh tá ai kơbố roê

Xuân môi tiah mê há, rơpŏng jâ Lê Thị Tư, ai lối 1,2 ha plâi nong xuân ôh tá châ tê pro rơpŏng tro lŭp ó. Jâ Tư ăm’nâi, nôkố, kơdrum plâi nong bu nếo châ tê môi iâ la yă tê rơpâ. Tê 1 tă plâi nong tá hâi tŭm liăn mơdrếo liăn ăm vâi krí. Maluâ tro lŭp la rơpŏng jâ xuân athế mung liăn vâ rak ngăn kơdrum loăng.

“Rơpŏng á nôkố ai dâng 5 troh 6 tâ̆n plâi la ôh tá châ tê hí môi iâ xua ôh tá ai ngế ki roê. Kơdrum loăng plâi nong kố, á ‘no liăn rak ngăn môi hơnăm tâi dâng 70 rơtuh la nốkố athế rak ngăn, rơvât phon, xôh pơkeăng tŭm vâ loăng plâi ai ivá ăm rơnó kơ’nâi. Tơdroăng ki yă tê hơnăm kố tơ’nôm ƀă pơreăng nếo mê plâi nong ôh tá châ tê, ai hngêi ki ‘nâ ôh tá tŭm liăn ‘no ngăn”.

Lối 10 tâ̆n plâi nong pái rơnó rơpŏng ngoh Phạm Công Văn ok hvât lôi

Tiô riân ngăn dêi cheăm Dak Gằn, nôkố lâp cheăm ai dâng 1 rơpâu ha plâi nong tŭm hdrê. Tung pơla mê, ai dâng 700 ha dế krí, ki dâi lĕm châ 15 troh 20 tâ̆n rêm ha tung môi rơnó.

Pôa Đỗ Viết hạnh, kăn phŏ hnê ngăn Vi ƀan cheăm Dak Gằn ăm ‘nâi, xua tơdjâk dêi pơreăng COVID-19, ki hên mâu khu pơkuâ kơdrum bu nếo châ tê môi iâ ƀă yă tê rơpâ, u ối cho athế hvât lôi xua ôh tá ai ngế roê ƀă yă rơpâ.

“’Na troăng hơlâ cheăm hiăng pâ thế ƀă mâu kơ koan ki ai tơdjâk krếo thế mâu khu mơdró kâ ki uâ pơliê ‘na plâi kâ, vâ rế hía rế séa ngăn pêi pro troh tơdroăng ki ‘no liăn cheăng. Kong pơlê mơhnhôk vâi krâ nhŏng mơ-eăm rak ngăn kơdrum ăm mâu hơnăm ki pơtối. Tơdrêng amê ngin ai pâ thế ƀă kơ koan tơnêi têa, hngêi rak liăn ai troăng hơlâ mơdon tơ’nôm kơxô̆ liăn chĕn lơ hdró kơxô̆ liăn chĕn kơdroh liăh laih ăm mung ƀă mâu ngế ki plâi nong vâ kơdroh ki tro lŭp”.

Tuấn Anh chêh

Katarina Nga tơplôu ƀă tơbleăng