VOV4.Sêdang - Pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 – 2026 cho tơdroăng cheăng ki kal. A kong pơlê Dak Nông, Vi ƀan tâ phĭu kong pơlê dế tơkŭm hnê mơhno mâu kơ koan, tíu pêi cheăng hbrâ rơnáu rak tơniăn tro tơdroăng, tơniăn tiô luât pơkâ.

Kơnôm pêi tro tơdroăng hnê tối ‘na tâ phĭu rah xo Kăn Kuô̆k hô̆i hneăng 15 ƀă kăn hnê ngăn Hô̆i đong kuăn pơlê rêm râ hneăng hơnăm 2021-2026, ki hên kuăn pơlê a mâu pơlê hơngế hơngo, kơtiê xơpá dêi kong pơlê Dak Nông hiăng hlê tâ hnoăng cheăng ƀă ki pơxúa dêi tơná. Mê cho H’Plơ a pơlê Sa Pa, cheăm Thuận An, tơring Dak Mil, ăm ‘nâi, jâ đi đo tơmâng ngăn mâu rôh hôp tơpui tơno ƀă tí tăng ‘nâi mâu tơdroăng ‘na mâu ngế châ tơbleăng inâi vâ rah xo pro kăn hnê ngăn Kuô̆k hô̆i, Hô̆i đong kuăn pơlê rêm râ.

“Ngin púi vâ mâu ngế ki châ kuăn pơlê rah xo, vâi kố thế pêi cheăng tâi ivá tơná vâ hnê mơhno tơbleăng pêi pro mơnhông thôn pơlê xông tơ-ƀrê, kum tơnêi têa rế ton rế xông tơ-ƀrê, kuăn pơlê rế kro mơdrŏng, cheăng kâ rế tơniăn”.

Vi ƀan Măt trâ̆n tơnêi têa kong pơlê Dak Nông tơkŭm po hneăng hôp tơpui tơno rôh má peá

Tiô jâ Nguyễn Thị Thu Hường, Ngế xiâm pơkuâ ngăn kăn sát, Ngế chêh tôm xo rơkong dêi Vi ƀan tâ phĭu rah xo kăn kong pơlê Dak Nông ăm ‘nâi, troh nôkố, tơdroăng hbrâ ăm rôh tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong kuăn pơlê rêm râ hneăng hơnăm 2021-2026 a kong pơlê Dak Nông hiăng châ tơbleăng teăm tơdrêng, tro tiô pơkâ dêi luât, tiô kơ hâi khế pơkâ dêi Hô̆i đong ngăn tâ phĭu Tơnêi têa ƀă Vi ƀan tâ phĭu rêm râ.

Lâp kong pơlê hiăng mơjiâng Khu ngăn tâ phĭu Kuô̆k hô̆i ƀă 14 Khu ngăn tâ phĭu  Hô̆i đong kong pơlê, 8 Vi ƀan tâ phĭu Hô̆i đong kuăn pơlê rêm râ râ tơring, 71 Vi ƀan tâ phĭu Hô̆i đong kuăn pơlê rêm râ cheăm. Klêi hôp tơpui tơno roh má 2, kong pơlê Dak Nông tơbleăng 11 ngế ki lo tơbriât pro kăn Kuô̆k hô̆i hneăng 15, 96 ngế lo tơbriât pro kăn hnê ngăn Hô̆i đong kuăn pơlê râ cheăm, hneăng hơnăm 2021-2026.

“Nôkố Khu hnê mơhno dêi kong pơlê xuân môi tiah Vi ƀan ngăn Tâ phĭu kong pơlê hiăng hnê mơhno ăm mâu tơring, mâu cheăm xĭng xoăng râ dêi tơná tơbleăng mơjiâng mâu khu tâ phĭu. Pơtối mê, cheăm kô thế ăm tơring mơnhên mâu kơpong tâ phĭu ƀă mơjiâng mâu tôh tâ phĭu. Tơdroăng séa ngăn mâu tíu tơmeăm xuân môi tiah xĭng xoăng liăn ƀă tơdroăng cheăng pêi ki ê mê ngin hiăng tí tăng ‘nâi tối ăm Vi ƀan Tâ phĭu kong pơlê hnê mơhno ăm mâu tíu ki mê hnê ‘na luât xuân môi tiah mâu tơdroăng hnê mơhno dêi tíu xiâm, hnê mâu kong pơlê vâ pêi pro tro tiô tơdroăng pơkâ hneăng tâ phĭu”.

Tơdrêng amê, khu kăn Vi ƀan Măt trâ̆n tơnêi têa rêm râ tơrŭm, hbrâ tŭm mâu tơdroăng vâ tơkŭm po klêi tơdroăng trâm mâ kuăn pơlê, mơhnhôk kuăn pơlê tâ phĭu rah xo mau ngế vâ pro kăn Kuô̆k hô̆i hneăng 15 ƀă kăn hnê ngăn Hô̆i đong kong pơlê hneăng hơnăm 2021-2026. Vi ƀan râ cheăm pơtối seá ngăn, tơ’nôm kuăn pơlê hơ’leh a tíu ki ối, mâu ngế ki dế lăm u ê lo ing tíu ối pơtân vâ tơniăn kơxô̆ kuăn pơlê tâ phĭu tro tiô luât hiăng pơkâ.

Pôa Nguyễn Phú Nghĩ, Kăn xiâm phŏ hnê ngăn Vi ƀan Măt trâ̆n kong pơlê Dak Nông ăm ‘nâi, Hneăng hôp tơpui tơno a rêm râ dêi kong pơlê tơbleăng tơdrăng, pro tro tuăn kuăn pơlê, tro tiô pơkâ, hâi khế luât pơkâ ƀă xuân châ rêm ngế kuăn pơlê vâ môi tuăn.

“Tơdroăng tơbleăng mâu kăn tơkŭm po a kơ koan, tíu pêi cheăng ƀă xo tơdroăng veăng hnê khĕn dêi kuăn pơlê a tíu pêi cheăng ƀă tơdroăng hnê tối dêi mâu kăn po rơdâ pêi pro tro khât. Mâu ngế ki tơbleăng inâi vâ rah xo mê vâ tối tung pơla lo tơbriât khu kăn hiăng rah xo tro ngế, tro tuăn, tro mâ vâ tơbleăng inâi lo tơbriât pro kăn Kuô̆k hô̆i ƀă Hô̆i đong kuăn pơlê rêm râ.

‘Na tiô pơkâ mâu kăn gá hên ngế vâ, ‘na tơdroăng cheăng, hơnăm, tăng mâu kăn ƀô̆ hơnăm ối nếo xuân tơniăn tro tiô pơkâ ƀă tơniăn ki vâ teăng mâ ƀă tơdroăng púi vâ troh luât dêi kuăn pơlê”.

A rôh seá ngăn tơdroăng cheăng hbrâ tâ phĭu hâi lơ 23/3, pôa Phùng Khánh Tài, Kăn phŏ hnê ngăn Vi ƀan Tíu xiâm Măt trâ̆n tơnêi têa Việt Nam pâ thế kong pơlê Dak Nông kal pơtối pêi tro hnoăng cheăng tối tơbleăng ‘na tâ phĭu tơniăn tơdâng, môi tuăn ƀă tơ-ƀrê. Măt trâ̆n tơnêi têa kong pơlê pêi tro tơdroăng hbrâ ăm hneăng hôp tơpui tơno rôh má 3 vâ rah xo, chêh inâi mâu ngế ki ai tŭm tiô tơdroăng pơkâ rah xo kăn Kuô̆k hô̆i ƀă kăn Hô̆i đong rêm râ hneăng hơnăm 2021-2026. Pakĭng mê pêi tro tơdroăng hriâm ăm mâu ngế cheăng tung Vi ƀan tâ phĭu rêm râ.

“A pâ thế kong pơlê pêi tro tơdroăng cheăng tơleăng mơnhên hlá đơn săm phoăng, săm tơkêng dêi kuăn pơlê. Pơtối seá ngăn ‘na mơngế ki lo tơbriât pro kăn Kuô̆k hô̆i xuân môi tiah kăn Hô̆i đong kuăn pơlê rêm râ, malối cho mâu tơdroăng’na ton nah tơdroăng kal kí, mâu tơdroăng kal kí nôkố rơtế ƀă mâu tơdroăng’na mơngế ki tối troh a mâu rôh hôp drêng trâm tơpui ƀă kuăn pơlê.

Tiô a tơmiât kô cho hnoăng ki kal khât vâ ‘nâi xiâm gá ing mê kô chôa seá ngăn nhên drêng kal. Ngin pâ thế kong pơlê tí tăng ‘nâi plĕng mâu tơdroăng ‘na kuăn pơlê malối a mâu tíu ki kuăn pơlê ối tô tuăn săm phoăng krâm mơngế.

‘Na tơdroăng tơnêi, hyôh kong prâi lơ mâu tơdroăng tơdjâk troh loi tĭng tiô khôp, kong pơlê kal thế tơmâng khât vâ tơleăng mơnhên, vâ mâu khu ki hriăn vâ xúa drêng ai tơdroăng cheăng pơkâ rĕng tro, rĕng mơdât xâu xía drêng vâi troh pro chiâng tơdjâk troh rôh tâ phĭu”.

Nôkố tơdroăng hbrâ Hâi leh kân tâi tâng kuăn pơlê dế pơtối châ kong pơlê Dak Nông tơbleăng pêi tơdrêng tâi tâng, rak tơniăn tro tiô pơkâ, ƀă hâi khế tơbleăng. Tơdroăng ki xiâm dêi kong pơlê cho cho tâ phĭu môi hdroh ai tŭm kơxô̆ mơngế ƀă rah xo tro mâu kăn ki rơkê khât, tơdrăng lĕm, tơxâng cho ngế ki vâ teăng mâ ăm tơdroăng púi vâ ƀă hnoăng pro xiâm dêi kuăn pơlê.

Tuấn Anh chêh

Gương tơplôu ƀă tơbleăng