VOV4.Sêdang - Tung mâu hơnăm hdrối, pakĭng mơjiâng tơmeăm khoăng, mơnhông pêi chiâk, mơdêk tơdroăng rêh ối dêi kuăn pơlê, tơdroăng mơjiâng thôn pơlê nếo a kong pơlê Dak Nông ai tơmâng troh tơdroăng pêi chiâk ing mơnhông tuá pêi cheăng tơrŭm. Kố xuân cho tơdroăng pơkâ pơklât thế ƀă rêm cheăm hdrối vâ châ mơnhên tối cheăm châ plah thôn pơlê nếo.

Tung mâu tơdroăng pơkâ thôn pơlê nếo, tơdroăng pơkâ kơxô̆ 13 ‘na tơrŭm pêt mơjiâng kế tơmeăm ai hnoăng cheăng ki kal, mơdêk tơdroăng cheăng kâ a kơpong thôn pơlê. Vâ pêi pro tơƀrê tơdroăng pơkâ kơxô̆ 13, mâu khu pêi cheăng tơrŭm hiăng hbrâ rơnáu mơdêk hnoăng cheăng pôu râng, rế hía rế châ mơnhên  hnoăng cheăng tung mơjiâng thôn pơlê nếo a kong pơlê.

Tiô pơkâ, cheăm châ mơnhên pêi klêi thôn pơlê nếo athế ai iâ hlái sap ing 1 túa pơkâ tơrŭm pêt mơjiâng kế tơmeăm ai túa pơkâ tơkŭm Khu pêi cheăng tơrŭm. Ƀă 7 to cheăm nôkố dế châ kong pơlê séa ngăn mơnhên pêi klêi thôn pơlê nếo mê ai tâi tâng 11 khu pêi cheăng tơrŭm dế pêi cheăng tơƀrê, veăng kum mơdêk mơjiâng pro, tê mơdró, mơdêk tơdroăng rêh ối dêi kuăn pơlê.

Cheăm Čư̆ K’nia, tơring Čư̆ Jut, kong pơlê Dak Nông ai Khu pêi cheăng tơrŭm tê mơdró xúa pơkeăng xôh kơdê oâ hdrong ăm kuăn pơlê ki pêi chiâk deăng Tiến Thành. Tiô pôa Bùi Xuân Nghĩa, Kăn pơkuâ Khu pêi cheăng tơrŭm Tiến Thành, tíu pêi cheăng dế uâ mơdiê tiu ƀă kơphế tiô pơkâ Organic ƀă dế mơnúa uâ pơliê kơphế tơpoăng. Khu pêi cheăng tơrŭm ai tơrŭm ƀă 1 khu pêi cheăng tơrŭm ki ê pêt mơjiâng, roê xo báu ST 24 ăm kuăn pơlê. Tung pơla pêt, Khu pêi cheăng tơrŭm po lâm hnê hriâm ‘na kih thuât ăm kuăn pơlê vâ mơdêk ki dâi lĕm, báu kơpâu lĕm.

Khu pêi cheăng tơrŭm pêi chiâk deăng – Tê mơdró  hưh cơ Hoàng Nguyên

Cheăm Thuận Hà, tơring Dak Song, kong pơlê Dak Nông ai Khu pêi cheăng tơrŭm pêi chiâk deăng – Tê mơdró – hưh cơ Hoàng Nguyên ƀă Khu pêi cheăng tơrŭm Pêi chiâk deăng Thuận Phát. Jâ Trần Thị Thu, Kăn pơkuâ Khu pêi cheăng tơrŭm Hoàng Nguyên ăm ‘nâi, tung pơla hdrối kố nah, tíu pêi cheăng kố hiăng pơkâ troăng ƀă tơkŭm kuăn pơlê ki pêi chiâk deăng pêt tiu tiô troăng hưh cơ, ƀă ƀăng tơnêi pêt lối 100 ha. Kơnôm mê, mâu ngế cheăng tung khu pêi cheăng tơrŭm pêi lo liăn châ hên, maluâ yă tiu tê tung kơchơ chu kơdroh ó.

Hơnăm 2020, Khu pêi cheăng tơrŭm tê ngi kong têa ê 400 tâ̆n tiu hưh cơ ƀă yă tê kơnâ tâk péa hdroh tâng vâ pơchông ƀă kơchơ roê, mê kuăn pơlê ki pêi chiâk deăng phiu khât. Tơdroăng ki pêt tiu hưh cơ a kong pơlê rế hía rế hlo hên, rơkê ƀă tơniăn tâ.

A hên tơring, cheăm ki ê a kong pơlê Dak Nông mâu khu pêi cheăng tơrŭm hiăng ƀă dế mơdêk hnoăng cheăng pêt, mơdêk pêi lo liăn ăm kuăn pơlê. Cheăm Dak Sôr, tơring Krông Nô ai Khu pêi cheăng tơrŭm pêi chiâk deăng – Tê mơdró tiu krúa Dak Sôr ƀă 30 ngế cheăng ƀă Khu pêi cheăng tơrŭm pêi chiâk deăng krúa Thành Phát ƀă 12 ngế cheăng. Mâu khu pêi cheăng tơrŭm kố hiăng hnê tối khoa hok kih thuât ăm kuăn pơlê vâ tê kế tơmeăm.

Ƀă Khu pêi cheăng tơrŭm Tê mơdró Bình Minh a cheăm Ea Pô, tơring Čư̆ Jut hiăng tơrŭm ƀă kuăn pơlê ki pêt kơphế ƀă tiu tiô pơkâ 4C, VietGAP. Tíu pêi cheăng kố xuân tơrŭm ƀă kŏng ti vâ roê xo tâi tâng mâu kế tơmeăm dêi vâi krâ nhŏng o ƀă hên ki ê.

Xuân môi tiah mê, ƀă hên tơdroăng ki tŏng kum, Khu pêi cheăng tơrŭm pêi chiâk deăng – Tê mơdró – Ăm mung liăn Đại Đồng Tiến ƀă Khu pêi cheăng tơrŭm Tân Thịnh, cheăm Quảng Khê, tơring Dak Glong hiăng tơ’mot châ 47 ngế veăng cheăng tơrŭm pêt kơphế tiô pơkâ UTZ. Tung pơla tơrŭm, liăn, kih thuât ƀă hên ki ê vâ pêi châ kế tơmeăm ki dâi lĕm dêi kế tơmeăm pêi lo ing chiâk deăng tiô pơkâ pơkâ UTZ.

Pôa Bùi Hoa Thám, kăn phŏ hnê ngăn Khu pêi cheăng tơrŭm kong pơlê Dak Nông, tung la ngiâ, khu kăn pơkuâ rêm râ đi đo pro tơ’lêi hlâu vâ Khu pêi cheăng tơrŭm pêt, tê mơdró. Mâu tơring, cheăm ai hên Khu pêi cheăng tơrŭm rế hía rế pêi cheăng tơƀrê, dâi lĕm. Dâi lĕm, mâu khu pêi cheăng tơrŭm hiăng mơdêk hnoăng cheăng dêi tơná tung mơjiâng thôn pơlê nếo a tơring, cheăm, kum kuăn pơlê pêi chiâk deăng hơ’leh mâu hdrê pêt, mơnăn păn ƀă xúa khoa hok kih thuât tung pêt mơjiâng kế tơmeăm vâ mơdêk ki ai plâi kơtốu hên, dâi lĕm dêi kế tơmeăm.

Mâu khu pêi cheăng tơrŭm rế hía rế tơtrŏng tơrŭm pêt, tê mâu kế tơmeăm tiô tơdroăng ki kơnía. Ing mê, pêt mơjiâng kế tơmeăm rế hía rế ai yă kơnâ ‘na cheăng kâ, veăng kum mơdêk pêi lo liăn ăm kuăn pơlê.

Hlá tơbeăng Dak Nông

Katarina Nga tơplôu ƀă tơbleăng