VOV4.Sêdang -Hlo tơdroăng ki hrá pêi pro troăng hơlâ tŏng kum mâu ngế ki xơpá xua pơreăng kân COVID-19, kăn pơkuâ Vi ƀan kong pơlê Dak Nông pơkâ thế mâu tơring, cheăm tung kong pơlê thế rĕng pơtroh liăn troh kŏng mâu ngế ki châ kĭ pơkâ tŏng kum hdrối hâi lơ 5/11, ƀă tung 10 hâi la ngiâ athế klêi tơdroăng tŏng kum ăm lối 37.600 ngế. Tiô tối tơbleăng dêi Khu ngăn cheăng pêi mố đô̆i tro rong ƀă rêh ối pơlê pơla kong pơlê Dak Nông, lâp kong pơlê séa ngăn châ lối 37.600 ngế ki xơpá xua pơreăng COVID-19 ƀă tâi tâng kơxô̆ liăn tiô tối hdrối tŏng kum lối 53 rơtal liăn.

Dak Nông mơdêk tơdroăng tŏng kum mâu ngế ki xơpá xua pơreăng COVID-19

A rôh hôp ‘no tơdrêng ing troăng hyôh internet ƀă mâu tơring, cheăm tung kong pơlê, kăn hnê ngăn Vi ƀan kong pơlê Dak Nông pơkâ thế khu pơkuâ athế tơkŭm pêi pro troăng hơlâ tŏng kum mâu ngế pêi cheăng ƀă mâu ngế ki xúa mâu ngế pêi cheăng tro tơdjâk ing pơreăng COVID-19, xua tung pơla rôh kố kuăn pơlê dế trâm hên xơpá kal châ tơmâng, tŏng kum tơdrêng.

Katarina Nga tơplôu ƀă tơbleăng