VOV4.Sêdang - Troh nôkố mâu tơring, cheăm a kong pơlê Dak Nông hiăng mơjiâng 680 tôh tâ phĭu khu kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ, hneăng hơnăm 2021 – 2026, klăng hâi khế pơkâ. Tiô Vi ƀan tâ phĭu kong pơlê Dak Nông hnoăng cheăng hbrâ rơnáu ăm hâi tâ phĭu hiăng châ hbrâ rơnáu tŭm. Nôkố Vi ƀan hnê ngăn mâu tơring, pơlê kong kơdrâm, cheăm, bêng, pơlê kân hiăng mơjiâng 680 kơpong tâ phĭu. Tung mê, ai 21 tôh tâ phĭu cho kơpong tâ phĭu krê mê cho mâu đông mố đô̆i gâk tơkăng kong, mâu tíu pêi cheăng ối tung Kŏng an kong pơlê, Khu pơkuâ ngăn lêng kong pơlê, Tíu ki mơgât pâk chik ma tŭi a kong pơlê.

Rêm tôh tâ phĭu ai 11 – 21 ngế, mê cho kăn tôh, ngế chêh tôm xo rơkong ƀă mâu ngế cheăng cho teăng mâ ăm kơ koan Tơnêi têa, khu tơrŭm cheăng kal kí, tơrŭm pơlê pơla, ƀă kăn teăng mâ kuăn pơlê a kong pơlê. Vi ƀan tâ phĭu kong pơlê hiăng pơkâ thế Hô̆i đong tâ phĭu tơnêi têa ăm 13 tôh tâ phĭu a 12 to đông mố đô̆i gak tơkăng kong ƀă 1 Tiêuh đoân ki hnê hriâm cơ đô̆ng tâ phĭu rĕng tâ hdrối 1 hâi vâ pêi dêi hnoăng cheăng.

Katarina Nga tơplôu ƀă tơbleăng