VOV4.Sêdang - Vi ƀan kong pơlê Dak Nông nếo tơbleăng pơkâ ‘na tơkŭm po mơdât mơngế mot ôh tá tro luât ing kong têa Kul mot tung kong pơlê. Pơtối mê, Khu pơkuâ ngăn pơkeăng ƀă khăm pơlât pơkuâ, tơrŭm ƀă mâu kơ koan ki tơdjâk hbrâ seá ngăn tíu, mơjiâng troăng pêi pro hngêi pơkeăng mơdât pơreăng COVID 19 drêng kal. Khu pơkuâ ngăn pơkeăng ƀă khăm pơlât hnê mơhno tối ăm ƀok thái pơkeăng ‘na ivá, tŏng kum khăm ngăn pêi pro hnoăng cheăng tơkŭm seá ngăn, gak ngăn a mâu troăng tíu tơkăng kong ƀă mâu troăng kân lăm ngi kong pơlê ki ê kơxô̆ 14, 28, troăng kân lăm ngi mâu tơring vâ mơdât krá tơniăn mơngế, rơxế ing mâu kong pơlê mot tung kong pơlê.

Rơtế ƀă hnê mơhno, pêi pro tơtro mâu roh pâk vaccine COVID 19 tơniăn, tro mơngế tiô pơkâ dêi Khu xiâm ngăn pơkeăng ƀă khăm pơlât, Khu pơkuâ ngăn pơkeăng ƀă khăm pơlât tơrŭm ƀă mâu tíu cheăng ki tơdjâk tơbleăng Vi ƀan kong pơlê tŏng kum kơxô̆ liăn, tơmeăm khăm pơlât, hbrâ kum kong pơlê Mondulkiri, kong têa Kul tung tơdroăng hbrâ mơdât COVID 19.

A Sa Ly tơplôu ƀă tơbleăng