VOV4.Sêdang - Hâi lơ 30/7, a kơpong pơlât mâu ngế tro tâ pơreăng COVID 19, Khu pơkuâ ngăn pơkeăng ƀă khăm pơlât kong pơlê Dak Nông hiăng diâp mơ-éa ăm mơ-éa lo hngêi pơkeăng ăm ngế tro tâ pơreăng 40.924. Ngế tro tâ pơreăng kố cho kơnốu, ngế tro tâ pơreăng má 40.924 cho V.H.L.E vê rơxế (kot mâ hơnăm 1991, ối a thôn Mỹ Long, cheăm Mỹ An, tơring Chợ Mới, kong pơlê An Giang).

Dak Nông: ngế tro tâ pơreăng COVID 19 apoăng châ pơlât prêi lĕm 

Klêi kơ’nâi môi pơla pơlât, khăm ngăn SARS CoV2 dêi ngế tro tâ kố a mâu hâi lơ 19/7, 26/7 ƀă 28/7 pơrá ăm hlo âm tĭnh. Troh hâi lơ 29/7, ngế ki kố hiăng klâ kơtăn 15 hâi ƀă ăm hlo 2 xôh khăm ngăn RT-PCR âm tĭnh tŭm, châ chăn hiăng tơniăn ƀă chiâng vâ lo hngêi pơkeăng. Nôkố kơpong pơlât mơngế tro tâ COVID 19 kong pơlê Dak Nông sap ing hâi lơ 9/7 troh nôkố hiăng tơdah ƀă dế pơlât 30 ngế.

Nôkố ivá dêi mâu ngế tro tâ pơreăng ki ê tơniăn, hên ngế hiăng ăm hlo âm tĭnh sap ing 1 troh 2 xôh. Tung hâi mê, kong pơlê Dak Nông châ hlo tơ’nôm 4 ngế tro tâ COVID 19, mơdêk kơxô̆ ngế tro tâ pơreăng dêi kong pơlê tâk 59 ngế.

A Sa Ly tơplôu ƀă tơbleăng