VOV4.Sêdang - Hâi lơ 26/4, kong pơlê Dak Nông tơbleăng pâk pơkeăng vaccine hbrâ mơdât pơreăng COVID-19 rôh apoăng ăm mâu ƀok thái pơkeăng, mâu ngế cheăng ngăn pơkeăng ki dế pơlât mâu mâu ngế tâ pơreăng. Hngêi pơkeăng kân Dak Nông ƀă Hngêi pơkeăng pơlê kong krâm Gia Nghiã cho 2 to hngêi pơkeăng ki apoăng châ rah ăm pâk vaccine COVID-19.

Ai 100 ngế châ pâk hbrâ mơdât rôh apoăng a hâi lơ 26/4 pêi pro tro tiô pơkâ dêi Khu xiâm ngăn pơkeăng. Rêm ngế klêi pâk kô châ séa ngăn sap 30 - 60 phut vâ hbrâ mơdât lơ ai mâu tơdroăng pro tơviah tung châ, hlối hnê ăm mâu ki mê hlá ngăn tơná a hngêi tung pơla 7 hâi. Tiô Khu xiâm ngăn pơkeăng pơlât Dak Nông, roh pâk vaccine ki apoăng kố ai pâk sap lơ 26/4 troh lơ 12/5, tơbleăng pâk a 8 tíu.

Tung roh pâk apoăng, kong pơlê Dak Nông châ khu xiâm ngăn pơkeăng pơlât xĭng xoăng 9.000 klŏng vaccine hbrâ mơdât COVID-19 dêi khu pro pơkeăng AstraZeneca. Dak Nông kô pâk ăm 2 rơpâu 844 ngế ki dế pêi hnoăng cheăng plâ mơdât pơreăng.

Gương tơplôu ƀă tơbleăng