VOV4.Sêdang - Vi ƀan tâ phĭu kong pơlê Dak Nông hiăng ai hlá mơ-éa kơxô̆ 69 pơtroh ăm Hô̆i đong tâ phĭu tơnêi têa ‘na tơdroăng ki pơkâ thế tơkŭm po tâ phĭu pôk kăn Kuô̆k hô̆i hneăng má 15 ƀă mâu tíu pêi cheăng cho đông mố đô̆i gak tíu tơkăng kong. Tiô Vi ƀan tâ phĭu kong pơlê Dak Nông, tung pơla hdrối kố nah a troăng tơkăng kong pơla Việt Nam – Kul ai hên tơdroăng ki ôh tá tơniăn, tơpá vâ ‘nâi hdrối ‘na tơdroăng pơreăng COVID-19.

Nôkố, kăn ƀô̆ lêng mố đô̆i gak tơkăng kong dêi kong pơlê Dak Nông dế tơkŭm pêi pro hnoăng cheăng rế hbrâ mơdât pơreăng COVID-19 rế rak ngăn troăng tơkăng kong.

Séa ngăn troăng 72, Luât tâ phĭu pôk kăn Kuô̆k hô̆i ƀă Hô̆i đong hnê ngăn kuăn pơlê, vâ rak vế krá tơniăn hnoăng pơkuâ gak kring tíu tơkăng kong tơnêi têa ƀă hbrâ mơdât pơreăng COVID-19, Vi ƀan tâ phĭu kong pơlê Dak Nông pơkâ thế Hô̆i đong tâ phĭu tơnêi têa ăm phêp tâ phĭu rê̆ng tâ môi hâi a 12 to đông gak tơkăng kong ƀă khu ki hnê hriâm cơ động 19 ối tung khu pơkuâ Mố đô̆i gâk tơkăng, kong pơlê.

Katarina Nga tơplôu ƀă tơbleăng