VOV4.Sêdang - Hâi lơ 4/5, Vi ƀan hnê ngăn kong pơlê Dak Nông hiăng ai mơ-éa pơkâ ‘na  tơdroăng pơtê pơtân mâu tơdroăng vâ pêi pro kơtăng mâu troăng hbrâ mơdât pơreăng COVID 19. Pơtối mê, sap ing kơmăng hâi lơ 4/5, mâu tơdroăng cheăng ki ôh tá kal khât môi tiah kuăn bar, karaoke, tíu kơhnhon xuâng kơdrâm mơngế, tíu xah điên tưh tơ’lêi tro tâ pơreăng COVID 19 tung kong pơlê thế pơtê pơtân  tơdroăng pêi cheăng.

Vi ƀan kong pơlê pơkâ thế mâu khu cheăng, kơvâ cheăng, kong pơlê ôh tá tơkŭm po mâu tơdroăng tơkŭm kơdrâm mơngế tâng ôh tá kal khât, pêi pro kơtăng mâu troăng hbrâ mơdât tiô tro pơkâ. Nôkố Dak Nông tá hâi hlo ngế ki lâi dương tĭnh ƀă COVID 19 ƀă tơdroăng pơreăng xông tâ tú tung kong pơlê ƀă hiăng châ mơdât lĕm. Xêo troh tâi hâi lơ 3/5, lâp kong pơlê dế ai 31 ngế klâ krê, séa ngăn.

A kong pơlê Mondulkiri, kong têa Kul, ai troăng tíu tơkăng kong ƀă Dak Nông hiăng châ hlo 3 ngế tro tâ COVID 19 tung pơlê pơla xua mê pơreăng tơ’lêi tâ tú ing troăng tíu tê mơdró ngi kong têa ê xông tâ tú tung kong pơlê.

A Sa Ly tơplôu ƀă tơbleăng