VOV4.Sêdang - Tơdroăng rak tiô pơkâ ‘na kring vế tơniăn pơlê pơla tung mơjiâng thôn pơlê nếo ai pơxúa khât, veăng pro tơdjâk troh tơdroăng ki mơ-eăm pêi pro mâu pơkâ ki ê. A kong pơlê Dak Nông hiăng mơjiâng ƀă po rơdâ mâu tuá kring vế tơniăn  a mâu thôn pơlê, môi tiah a mâu kâu lak ƀô̆ hơnăm ối nếo hbrâ, mơdât mâu ki pro xôi, gâk a bo cheăng pơlê, tŏn teng nĕng ƀă ngăn a camera kring vế tơniăn. Ing mê, veăng ‘no hnoăng tung tơdroăng ki kal pê klêi pơkâ ‘na kring vế tơniăn tung mơjiâng thôn pơlê nếo.

Tiô mơnhên tối dêi Khu hnê mơhno cheăng mâu tơdroăng pơkâ dêi tơnêi têa kong pơlê Dak Nông, tơdroăng pơkâ gak kring vế tơniăn tung mâu tơdroăng ki xơpá pêi pro, xua gá tơkôm tung hên tơdroăng, hên khu lêng rơtế tơdjuôm ivá ƀă tơ’lêi tro hơ’lêh. Laga, mơnhên kố cho tơdroăng pơkâ ki kal xiâm, ai tơdroăng ki rak tơniăn ăm tơdroăng ki pêi klêi ƀă rak krá hên tơdroăng pơkâ ki phá tơ-ê dêi pó mê mâu hơnăm hdrối nah, khu râ Đảng, khu kăn pơkuâ kong pơlê đi đo tơmâng ngăn pơkâ thế pêi pro.

Rêm hơnăm, khu kăn Đảng, khu kăn pơkuâ rêm râ pơrá ai tơdroăng pơkâ ‘na hnoăng cheăng rak vế tơniăn kring vế, gak ngăn. Mâu tơring, cheăm pơkâ thế tơkŭm pêi pro châ tơƀrê tơdroăng ki Tâi tâng kuăn pơlê rak vế kring tơniăn Tơnêi têa. Khu lêng kŏng an rêm râ hbrâ rơnáu mơjiâng tơdroăng ‘na rak vế tơniăn gak kring tơdroăng kal kí ƀă tơniăn tung lâp pơlê pơla. Pêi pro tơtro ƀă tơdroăng ki ai khât, pơkâ tơleăng mâu tơdroăng ki xơpá vâ tŏng kum a tơring, cheăm.

Ki xiâm, tơring Dak Rlâp, kong pơlê Dak Nông hiăng mơjiâng ƀă po rơdâ mâu túa pơkâ rak tơniăn kring vế a mâu thôn, pơlê môi tiah mâu kâu lak ƀô̆ hơnăm ối nếo hbrâ mơdât mâu ngế ki pro xôi, bo cheăng, teng nĕng ƀă camera gak kring ƀă hên ki ê. Ing mê, tơring ôh ti xê to mơdêk tro hnoăng cheăng dêi khu lêng xiâm mê cho kŏng an, khu lêng, kuăn pơlê rak vế mê ối mơhnhôk tá pơlê pơla tíu kuăn pơlê rêh ối rơtế rak vế gak kring. Xua mê, 9/9 to cheăm tung tơring pơrá pêi klêi tơdroăng pơkâ ‘na rak tơniăn gak kring.

A tơring Dak Mil, rêm râ, kơvâ cheăng, khu pú hên mơdêk hnoăng cheăng tơrŭm, tơkŭm po hên tơdroăng cheăng môi tiah tơbleăng tơdroăng Tâi tâng kuăn pơlê rak vế gâk kring Tơnêi têa; tối tơbleăng kăn ƀô̆, mơngế pơkuâ, mơngế cheăng tung kơ koan, kuăn pơlê mơdêk ki hlê plĕng ‘na tuăn tơmiât; tơdroăng ki kal dêi hnoăng cheăng rak vế tơniăn gak kring.

Ing mê, tơdroăng gak kring pơlê pơla a mâu cheăm châ rak tơniăn, mâu tơdroăng ki pro xôi tung pơlê pơla ƀă mâu tơdroăng ki pro xôi ‘na luât hiăng  kơdroh. Mâu túa pơkâ ‘na kâu lak ƀô̆ hbrâ mơdât tơdroăng ki xiăn pâm tung rơpŏng hngêi, tôh rak ngăn khu rơpŏng hngêi rak ngăn xêh ‘na rak tơniăn gâk kring, hngêi trung hriâm châ rak vế, mơdêk tơƀrê.

A tơring Dak Song, túa pơkâ “Idrâp teng nĕng gâk kring” hiăng kum kơhnâ khât tung tơdroăng ki pêi klêi tơdroăng pơkâ gak kring – rak tơniăn tung mơjiâng thôn pơlê nếo. Krê a thôn 7 ƀă thôn 8 cheăm tơkăng kong Thuận Hà, hiăng kơtúa 5 to teng nĕng ƀă xing xoăng kơtúa a mâu tíu ki kal tíu kuăn pơlê rêh ối. Rêm rôh tŏn teng nĕng, rak tơniăn idrâp tơdjâk troh hngế tung pơla 1,5 km. Klêi tâng idrâp teng nĕng, kô ai mâu tôh gak kring kuăn pơlê troh tơdrêng hlối a tíu ki mê vâ ‘nâi nhên ƀă pơkâ tơleăng tơdroăng.

Pôa Nguyễn Đình Lương, kăn pơkuâ kŏng an cheăm Thuận Hà, tởing Dak Song ăm ‘nâi: tâng vâ pơchông ƀă hdrối nah, tơdroăng gak kring a mâu thôn 7, 8 hiăng ai hên tơdroăng ki hơ’lêh, malối cho sap ing ai túa pơkâ tôu teng nĕng mê tá hâi hlo ai tơdroăng ki tong hơ’vĕng tơmeăm ki lâi. Tơƀrê khât dêi túa pơkâ kố cho pro mâu kuăn pơlê hlê plĕng pêi pro kơtăng luât pơkâ, mơdêk hiâm mơno hbrâ kơchăng, kơhnâ veăng săm tối mâu ngế ki pro xôi.

Ing mê, kơ koan ki ai tơdjâk troh rĕng tơplâ mơdât mâu tơdroăng pêi pro dêi mâu khu ‘mêi ƀă pơkâ tơleăng mâu tơdroăng ki ai tơdjâk troh gâk kring tơniăn.

Tiô mơnhên tối dêi Khu hnê mơhno cheăng mâu tơdroăng pơkâ tơnêi têa kong pơlê Dak Nông, klêi kơ’nâi lối 10 hơnăm pêi pro Tơdroăng pơkâ dêi tơnêi têa ‘na mơjiâng thôn pơlê nếo hơnăm 2010 – 2020, hnoăng cheăng rak tơniăn gak kring tung kơpong thôn pơlê hlo ai hên tơdroăng ki hơ’lêh. Tung mê, khu kŏng an hiăng hbrâ tí tăng ‘nâi plĕng, pơtroh ăm khu kăn Đảng, khu kăn pơkuâ pêi pro tro, pơkâ tơleăng tơdrêng mâu tơdroăng ki ôh tá tơniăn tung tơxup tơbriât tơbriât, pơsăm tối, pro tơ’lêi hlâu ăm tơdroăng ki tơbleăng mâu tơdroăng tơkêa xuân môi tiah hnoăng cheăng mơnhông cheăng kâ rêh ối pơlê pơla a tơring, cheăm.

Troh nôkố, lâp kong pơlê Dak Nông ai 45/60 to cheăm pêi klêi ƀă dế rak vế tơdroăng pơkâ ‘na rak tơniăn gak kring ƀă 75%. Tung mơnhông mơdêk nôkố, vâ rak vế, mơdêk tơdroăng ki tơƀrê kố, pâ thế pin mơ-eăm pôi tá la lâi pơtê ƀă môi tuăn dêi khu kăn Đảng, khu kăn pơkuâ ƀă kuăn pơlê tung mơjiâng thôn pơlê nếo.

Kong pơlê Dak Nông dế mơdêk pêi pro mơjiâng thôn pơlê nếo, pâ thế hên tâ tơdroăng ki tơdjuôm ivá dêi mâu khu pơkuâ tơdroăng kal kí, rêm rơxông kuăn pơlê, hiâm mơno khŏm mơ-eăm dêi khu ki xiâm, pôi tá ăm phêp ai tơdroăng ki ôh tá vâ hmâng, ôh tá vâ hbrâ kơchăng.

Hlá tơbeăng Dak Nông

Katarina Nga tơplôu ƀă tơbleăng