VOV4.Sêdang - Hâi lơ 9/4, Viƀan kong pơlê Dak Nông tơkŭm po roh hôp vâ tơmâng tơbleăng ƀă tơpui tơno troăng tah lôi pá puât, tơvâ tơvân tung  tơdroăng ôm hyô ki chiâng xêh a kơpong Tà Đùng (Dak Glong). Kơpong Tà Đùng cho môi tíu tơmeăm khoăng ối tung Kơdrum tơnêi tíu lâp plâi tơnêi UNESCO Dak Nông. Tíu kố ai mâu tơmeăm khoăng ki lĕm, châ hên khu mơ’no liăn cheăng ƀă tơmối rơhêng vâ châ hlo châ ngăn, kơxô̆ tơmối troh ôm ngăn đi đo tâk hên. Mâu kơ koan tê mơdró  nôkố a Tà Đùng ki hên bu pêikŭn môi tiah djâ lăm ngăn, hngêi ăm tơmối ối pơtê, ô kâ ƀă hía hé.  Tơdroăng ki po tíu ối pơtê ki hên cho rơkôp kŭn, tơmeăm khoăng ôh tá ai hên. Xông tơpui mơgêi roh hôp, pôa Nguyễn Đình Trung – Kăn hnê ngăn Viƀan kong pơlê Dak Nông tối, tung pơla kố nah, Tà Đùng châ ‘nâi troh cho tíu ai loăng pơlái kong kế lĕm mơnâ mâ ngăn. Laga,  tơdroăng pơhlêh, pơkuâ  tơdroăng ôm hyô a kố tá hâi tơniăn tiô pơkâ. Xua mê, khu râ kăn pơkuâ, mâu kơvâ cheăng kal thăm pơkuâ ‘na tơnêi tíu, mơjiâng pro kế tơmeăm khoăng, tơniăn pơlê pơla.

A Sa Ly tơplôu ƀă tơbleăng