VOV4.Sêdang - Drêng ai pơreăng xông tâ tú ó dêi pơreăng kân COVID 19 xông tâ tú roh má 3 a kong têa Kul, Vi ƀan kong pơlê Dak Nông hnê mơhno Khu xiâm pơkuâ Mô đô̆i gak kring tíu tơkăng kong kong pơlê ƀă mâu khu ki tơdjâk pêi pro krá tơniăn tơdroăng pơkuâ mot lo tung tơnêi têa, hbrâ mơdât pơreăng xông tâ tú.

Dak Nông thăm hbrâ mơdât pơreăng Covid 19 tâ tú ing troăng tíu tơkăng kong 

Mô đô̆i gak kring tíu tơkăng kong dêi kong pơlê thế pêi pro kơtăng  tơdroăng gak ngăn ‘na pêi cheăng a mâu tíu tê mơdró ngi kong têa ê, mâu tíu gak ngăn vâ mơdât mơngế ing kong têa ê mot, tơkâ tíu tơkăng kong ôh tá tro luât drô troăng tíu tơkăng kong tung kong pơlê.

Mâu khu râ kăn pơkuâ tung kong pơlê pơkuâ, séa ngăn krá tơniăn kuăn pơlê troh ối a tung pơlê cheăm. Khu hnê mơhno hbrâ mơdât pơreăng COVID 19 kong pơlê Dak Nông tối ăm ‘nâi, rơtế ƀă thăm pêi pro mâu troăng hbrâ mơdât pơreăng, Dak Nông xuân thăm hbrâ kơmăi kơmok, kế tơmeăm khăm pơlât vâ pơlât teăm tơdrêng tâng COVID 19 xông tâ tú. 

A Sa Ly tơplôu ƀă tơbleăng