VOV4.Sêdang - Drêng ai pơreăng COVID-19 dế pơtối xông tâ tú ó a kong têa Kul, Khu ngăn ‘na mô đô̆i gak tơkăng kong dêi kong pơlê Dak Nông ƀă mâu khu râ pơkuâ hiăng thăm pêi pro kơtăng tơdroăng cheăng lăm séa  ngăn, tí tăng ‘nâi a kơpong tíu tơkăng kong, ôh tá ăm ai kuăn mơngế lo ing kong têa ê mot tung tơnêi têa, tơkâ luâ troăng tơkăng kong dêi pó ah lơ chiâng ai tơdroăng tâ tú pơreăng.

Kong pơlê Dak Nông ai troăng tíu tơkăng kong xŏn 141 km tơkăng ƀă kong pơlê Mondulkiri, kong têa Kul, tíu hiăng châ hlo mâu ngế tro tâ COVID 19 xông tâ tú tung pơlê pơla. Đăi tă Phan Qúy Vỹ, Phŏ pơkuâ cheăng Đảng Khu xiâm pơkuâ Mô đô̆i gâk kring tíu tơkăng kong dêi kong pơlê Dak Nông tối ăm ‘nâi, drêng pơreăng COVID 19 xông tâ tú ó a kong têa Kul, mê mơni kô ai mơngế Việt Nam ing peăng kong têa Kul tơkâ tíu tơkăng kong lăm a tơnêi têa pin vâ hbrâ ví pơreăng. 

Khu râ kăn pơkuâ kong pơlê Dak Nông séa ngăn tơdroăng thăm hbrâ mơdât pơreăng COVID 19 drô troăng tíu tơkăng kong

Xua mê, Khu xiâm pơkuâ Mô đô̆i gâk kring tíu tơkăng kong dêi kong pơlê pơkâ  thế kăn ƀô̆, mâu mô đô̆i 12 đông gâk kring tíu tơkăng kong pôi tá tơngôu, thế đi đo kơchăng, thăm séa ngăn krá tơniăn kơpong tíu tê mơdró ngi kong têa ê, troăng kŭn, troăng kân:

“Vâ teăm tơdrêng hbrâ mơdât pơreăng, Mô đô̆i gak kring tíu tơkăng kong hiăng pêi pro 25 tôh gâk a drô tíu tơkăng kong ƀă khu hbrâ mơdât pơreăng đi đo séa ngăn, lăm ngăn drô mâu troăng kŭn, mâu kơpong ki kô tơ’lêi ai mơngế tơkâ luâ tíu tơkăng kong ƀă mot a tơnêi têa pin. Ngin hiăng pêi pro kơtăng pơkâ dêi khu râ kơpêng, dêi Khu xiâm pơkuâ lêng ƀă Vi ƀan kong pơlê ‘na tơdroăng hbrâ mơdât COVID 19, ôh tá ăm ai ngế kong têa ê lăm tơkâ tíu tơkăng kong mot a tơnêi têa pin.

Tơdrêng amê, ngin pêi tơtro tơdroăng pơtâng tối, mơhnhôk kuăn pơlê pêi tơtro  tơdroăng hbrâ mơdât pơreăng ƀă veăng tơdroăng châ hlo mâu ngế pro xôi xuân môi tiah mâu tơdroăng mot tung tơnêi têa pin, tơkâ tíu tơkăng kong ôh tá tro luât vâ teăm tơdrêng pơxâu phâk”.

Khu mô đô̆i gak kring tíu tơkăng kong Dak Nông séa ngăn a mâu troăng kŭn, troăng kân a kơpong tíu tơkăng kong

Rơtế rak 100% pơ’leăng mâ mơngế a mâu đông gak kring tíu tơkăng kong. Khu xiâm pơkuâ Mô đô̆i gâk kring tíu tơkăng kong dêi kong pơlê Dak Nông hiăng pơkâ thế Khu xiâm pơkuâ mô đô̆i kong pơlê pơtroh tơ’nôm mâu kăn ƀô̆, mâu mô đô̆i ối tung mâu Đăi đô̆i ƀô̆ ƀinh pro đông drô tíu tơkăng kong pêi ăm  tơdroăng hbrâ mơdât pơreăng. Tơdrêng amê pơkâ thế mâu cheăm tíu tơkăng kong thăm pơtroh tơ’nôm Tiêuh đô̆i khu lêng kuăn pơlê ki ai mâ đi đo ăm mâu tíu gâk hbrâ mơdât pơreăng COVID 19.

Rơtế ƀă khu mô đô̆i, kơvâ khăm pơlât kong pơlê Dak Nông xuân pơtroh mâu kăn ƀô̆ a mâu tíu gâk tơkăng kong ƀă troăng “Thăm hbrâ mơdât, rĕng châ hlo, rĕng klâ kơtăn, pơlât châ tơƀrê, tơleăng kêi tơdroăng, rĕng tơniăn tơdroăng”. Pôa Hà Văn Hùng – Phŏ pơkuâ ngăn pơkeăng ƀă khăm pơlât kong pơlê Dak Nông tối ăm ‘nâi, nôkố ai 100 ngế ƀok thái pơkeăng teăng dêi pó gak rơtế ƀă kăn ƀô̆, mô đô̆i hbrâ mơdât pơreăng xông tâ tú. Tâi tâng mâu ngế tơkâ luâ tíu tơkăng kong drêng châ hlo pơrá châ khu cheăng djâ klâ ối kơtăn tiô tro pơkâ.

“Kong pơlê Dak Nông nôkố xuân tá hâi châ hlo ngế dương tĭnh ki lâi, laga ngin ôh tá chiâng tơngôu, mâu tíu cheăng xuân thế đi đo séa ngăn, tơkŭm pêi pro mâu troăng hbrâ mơdât pơreăng kơtăng. Kơvâ khăm pơlât hiăng tơrŭm ƀă mâu khu cheăng, kơvâ cheăng pêi pro kơtăng tơkŭm mơdât tơdroăng ki mâu ngế ki nhôm tâ tú pơreăng ing kong têa Kul. Nôkố ai dâng 200 ngế tung mê ai ƀok thái pơkeăng ƀă mô đô̆i gâk kring tíu tơkăng kong đi đo gâk plâ hâi plâ măng a mâu tíu gâk, ôh tá ăm mơngế ki ing tíu ai pơreăng châ mot.

Khu cheăng kih thuât, ngin xo mâu tơring, pơtih mâu tíu gak a tơring Čư Jut mê kô xo khu ƀok thái pơkeăng Čư Jút, tâng ối a tơring Dak Mil mê xo khu pêi cheăng khăm pơlât a Dak Mil, ƀă a péa tíu tê mơdró ngi kong têa ê mê ngin xo ing Tíu xiâm mơdât pơreăng kong pơlê troh tŏng kum”.

Hdrối mê, kong pơlê Dak Nông hiăng ai hlá mơ-éa hnê mơhno mâu khu cheăng, kơvâ cheăng, mâu khu ngế, khu râ, mâu đông lêng, mâu tơring xuân ôh tá chiâng tơngôu tung tơdroăng hbrâ mơdât pơreăng; kơdroh tơkŭm po mâu  tơdroăng kal, tơdroăng tơkŭm kơdrâm mơngế ki ôh tá kal khât. Tơdrêng amê, pêi pro kơtăng mâu troăng tơniăn, thế pâng rơkong môh, xôh pơkeăng kơdê pơreăng ƀă hía hé tiô tro pơkâ.

Mâu khu cheăng pơkuâ krá tơniăn tơdroăng mot tung tơnêi têa pin, klâ ối kơtăn, séa ngăn khăm pơlât; tơdrêng amê hbrâ mâu kế tơmeăm khoăng ki kal hbrâ po rơdâ mơngế mot tung tơnêi têa drêng pơreăng hiăng chía kơdroh tiô troăng mơnhông tơtêk laga thế tơniăn lĕm.

Tuấn Anh chêh

A Sa Ly tơplôu ƀă tơbleăng