VOV4.Sedang - Vâ tơniăn kring vế cheăng kal kí, tơniăn lâp pơlê pơla roh tâ phĭu rah xo kăn teăng mâ Kuô̆k hô̆i hneăng má XV ƀă Hô̆i đong kuăn pơlê mâu râ hneăng hơnăm 2021 – 2026, Kŏng an kong pơlê Dak Nông hiăng mơjiâng pơkâ ƀă po rơdâ pêi pro tơdâng mâu troăng kring vế, gak ngăn. Pơtối mê, Kŏng an kong pơlê Dak Nông hiăng thăm pơtroh mơngế chu a mâu tíu cheăng vâ ‘nâi tơdroăng, po rơdâ pêi pro mâu troăng hnoăng cheăng, pơtâng tối, mơhnhôk kuăn pơlê pêi tơtro troăng hơlâ dêi Đảng, luât dêi Tơnêi têa, thăm veăng tâ phĭu rah xo kăn; teăm tơdrêng châ hlo ƀă tơplâ mơdât tŭm tơdroăng ki ‘mêi dêi khu mơngế ‘mêi tăng ‘nhê roh tâ phĭu rah xo kăn Kuô̆k hô̆i hneăng má XV ƀă Hô̆i đong kuăn pơlê mâu râ.

Kŏng an kong pơlê Dak Nông lo lăm pêi cheăng rak tơniăn kring vế pơlê pơla

Kŏng an mâu tơring, cheăm hiăng po roh lăm pơtrui rup mâu ngế xôi kân, cheăng kâ lu lêa, ma tŭi, thăm pơkuâ mơ-éa ‘na tơniăn pơlê pơla, đi đo séa ngăn pơ’leăng mâ mơngế, tơdroăng rêh ối pơtân.

A Sa Ly tơplôu ƀă tơbleăng