VOV4.Sêdang - Drêng tơbâ 131 hơnăm hâi kot mâ Pôa Hồ Chí Minh, kăn xiâm hnê ngăn tơnêi têa pin hneăng apoăng, kơxo lơ 19/5, a cheăm Dak Nia, pơlê kong kơdrâm Gia Nghĩa, Vi ƀan hnê ngăn kong pơlê Dak Nông tơkŭm po Leh tơbleăng ’’Têt pêt loăng plâ rơxông pâ Pôa Hồ’’ ƀă pêt loăng tơprâ tơprŭng hơnăm 2021. A leh tơbleăng, kăn pơkuâ kong pơlê Dak Nông krếo thế rêm ngế kăn ƀô̆, mơngế cheăng, mâu lêng ƀă kuăn pơlê pêt iâ hlái cho 1 xiâm loăng ngiât, kơhnâ pêi pro pêt loăng tiô rơkong hnê dêi Pôa vâ rak vế kong prâi, mơdêk tơdroăng ki ngiât kơphô̆.

Dak Nông tơbleăng Têt pêt loăng plâ rơxông pâ Pôa Hồ

Klêi kơ’nâi leh tơbleăng, 350 to xiâm loăng kơpeăng ƀă loăng tróu  hiăng châ pêt a Kơpong pêi chiâk deăng xúa kơmăi kơmok chal nếo, cheăm Dak Nia, pơlê kong kơdrâm Gia Nghĩa. Tung rôh kố, mâu tơring, cheăm tung kong pơlê xuân lo pêt dâng 51 rơpâu xiâm loăng.

Pôa Lê Trọng Yên, kăn phŏ hnê ngăn Vi ƀan kong pơlê Dak Nông ăm ‘nâi, a kong pơlê Dak Nông kong kế rế hía rế kơdroh tá ƀăng tơnêi ƀă mâu loăng kong.Vi ƀan hnê ngăn kong pơlê rơhêng vâ mâu kơ koan, kơvâ cheăng, khu tơrŭm pú hên ƀă kuăn pơlê mơdêk rak vế kong, kơhnâ pêt loăng ngiât, rak ngăn kong, mơdêk ki dâi lĕm ăm kong prâi rêh ối.

Katarina Nga tơplôu ƀă tơbleăng