VOV4.Sêdang - Khu mơjiâng Dak Nông pơkuâ tơrŭm ƀă Kŏng ti tơlo liăn Grup pơkuâ T and T ƀă khu râ kăn pơkuâ Vi ƀan pơlê kong kơdrâm Gia Nghĩa tơkŭm po leh tơbleăng tơdroăng pơkâ mơjiâng pro kơpong ôm hyô ngăn loăng pơlái kong kế long têa Dak R’Tih ai ƀăng lối 1.715 ha tá kơpong tơnêi ối tung mâu bêng Quảng Thành, Nghĩa Phú, cheăm Dak R’Moan ƀă tíu long têa hngêi kơmăi on tơhrik Dak R’Tih ối tung cheăm Dak R’Moan, pơlê kong kơdrâm Gia Nghĩa.

Pro tíu vâ mơjiâng kơpong ôm hyô ngăn loăng pơlái kong kế long têa Dak R’Tih

Tơdroăng tơkêa bro châ xing xoăng tiô 7 kơpong, tíu châ pro tơ’lêi hlâu ‘na troăng klông ai troăng ki xiâm tơdjêp mâu kơpong pêi cheăng ki ê dêi tíu kơdrâm kuăn pơlê rêh ối pêi cheăng.

Pakĭng mê, tơdroăng tơkêa bro xuân kô mơjiâng mâu hngêi trăng troăng klông ki xiâm, mâu kơpong ối pơtê, tơmeăm ki tơdjuôm ai pêt loăng sâp rơngiâp, mơhno khôi túa lĕm dêi vâi krâ mâu hdroâng kuăn ngo tung kong pơlê.

A Sa Ly tơplôu [ă tơbleăng