VOV4.Sêdang - Kơxo lơ 14/4, Vi ƀan Măt trâ̆n tơnêi têa Việt Nam kong pơlê Dak Nông tơkŭm po hneăng hôp roh má 3 vâ râh xo inâi mâu ngế ki ai tŭm ivá tro tiô pơkâ vâ rah xo kăn Kuô̆k hô̆i hneăng XV ƀă mâu kăn Hô̆i đong hnê ngăn kong pơlê Dak Nông hneăng IV, hneăng hơnăm 2021-2026 . Klêi tơpui tơno, tâi tâng mâu kăn ki veăng hôp hiăng têk kŏng vâ môi tuăn ƀă inâi mâu ngế ki ai tŭm ivá vâ lo tơbriât pro kăn Kuô̆k hô̆i hneăng XV mê ai 10 ngế (tung mê Tíu xiâm tơbleăng 2 ngế, kong pơlê tơbleăng 8 ngế) ƀă môi tuăn ăm 3 ngế ki hiăng nâp đơn pâ pơtê ôh tá veăng rah xo kăn Kuô̆k hô̆i hneăng XV.

Vi ban Măt trâ̆n tơnêi têa kong pơlê Dak Nông tơkŭm po hneăng hôp roh má 3

Pakĭng mê, Hneăng hôp hiăng chêh inâi 88 ngế ai tŭm ivá vâ rah xo kăn Hô̆i đong hnê ngăn kong pơlê Dak Nông, hneăng hơnăm 2021-2026. Tung mê, kơxô̆ mâu kăn kơdrâi ai 39 ngế, mâu kăn kuăn ngo 20 ngế, mâu kăn hơnăm ối nếo 31 ngế, pá gong Đảng 9 ngế ƀă kơxô̆ mâu kăn pơtối vâ rah xo nếo ai 21 ngế.

A Sa Ly tơplôu ƀă tơbleăng