VOV4.Sêdang - Sap apoăng hơnăm troh nôkố, Khu pơkuâ kuăn pơlê pêi chiâk deăng kong pơlê Dak Nông hiăng tŏng kum kuăn pơlê mung liăn vâ mơ’no liăn mơnhông pêt loăng plâi ƀă păn mơnăn. Kơxô̆ liăn mung châ xo ing Khu pơkuâ kơxô̆ liăn tŏng kum kuăn pơlê pêi chiâk deăng dêi Khu pơkuâ kuăn pơlê pêi chiâk deăng kong pơlê ƀă tâi tâng kơxô̆ liăn lối 1 rơtal 300 rơtuh liăn.

Ing kơxô̆ liăn kố, Khu pơkuâ kuăn pơlê pêi chiâk deăng kong pơlê mơ’no ăm 11 rơpŏng kuăn pơlê a cheăm Dak Ndrót, tơring Dak Mil mung 500 rơtuh liăn vâ mơ’no păn pu pái; 11 rơpŏng a cheăm Trường Xuân, Dak Song mung 300 rơtuh liăn mơ’no vâ rak ngăn kơphế; 10 rơpŏng a pơlê kân Dak Mâm, Krông Nô mung 500 rơtuh liăn vâ rak ngăn kơphế.

Tâi tâng mâu rơpŏng pơrá xúa kơxô̆ liăn mung châ tơƀrê, tro tiô pơkâ. Tung la ngiâ, Khu pơkuâ kuăn pơlê pêi chiâk deăng kong pơlê pơtối séa ngăn tơdroăng xúa kơxô̆ liăn mung, kum mâu rơpŏng kuăn pơlê pêi kâ châ tơƀrê.

A Sa Ly tơplôu ƀă tơbleăng