VOV4.Sêdang - Kơxê lơ 2/8, a kơpong klâ krê pơlât COVID-19 dêi kong pơlê Dak Nông, kơvâ ngăn pơkeăng ƀă khăm pơlât kong pơlê hiăng diâp hlá mơ-éa lo ing hngêi pơkeăng ăm péa ngế klêi kơ’nâi pơlât pơreăng. Péa ngế ki châ lo ing pơkeăng rôh kố cho kơnốu ki tâ má 26.004 Đ.Q.N. (Kot mâ hơnăm 1995, ối a pơlê kân Krông Kmar, tơring Krông Bông, kong pơlê Dak Lak vê rơxế chơ tơmeăm sap ing Pơlê kong kân Hồ Chí Minh vêh a pơlê kong kơdrâm Ƀuôn Ma Thuột, kong pơlê Dak Lak a hâi lơ 8/7.

Dak Nông tơ’nôm péa ngế tâ COVID-19 châ pơlât prêi, lo ing hngêi pơkeăng

Ngế ki má péa cho kơdrâi ki tâ pơreăng 31.604 C.T.Q (Kot mâ hơnăm 1996, ối a thôn 7, cheăm Dak Wer, tơring Dak Rlâp, kong pơlê Dak Nông). Tiô tơdroăng pơlât dêi Khu xiâm ngăn pơkeăng, nôkố lâm sàng dêi péa ngế ki kố hiăng tơniăn ƀă ai tŭm tơdroăng ki châ lo ing hngêi pơkeăng. Hdrối mê, kong pơlê Dak Nông hiăng diâp ăm hlá mơ-éa lo ing hngêi pơkeăng ăm ngế ki tâ pơreăng má 40.924 V.H.L.E (Kot mâ hơnăm 1991, ối a cheăm Mỹ An, tơring Chợ Mới, kong pơlê An Giang). Riân troh kơxế lơ 2/8, kong pơlê Dak Nông ‘nâi ai 80 ngế tâ COVID-19 a 7 tơring, pơlê krâm, pơlê kong kơdrâm.

Katarina Nga tơplôu ƀă tơbleăng