VOV4.Sêdang - Tiô tơdroăng ăm ‘nâi ing Kŏng an tơring Krông Pač, kong pơlê Dak Lak, Kơ koan séa ngăn tơdroăng xôi, Kŏng an tơring dế tơkŭm po séa ngăn pêi pro nhên xiâm kối mơnât lo gât rơlâm tơhnâp a cheăm Ea Yiêng pro 3 ngế muăn tro rong ƀă hlâ. Ngế ki hlâ mê châ mơnhên cho muăn Gia Nhi, 8 khế, péa ngế muăn tro rong cho Du Mi, 7 hơnăm ƀă Du Hi, 5 hơnăm, tá 3 ngế muăn kố pơrá ối a cheăm Ea Yiêng, tơring Krông Pač, kong pơlê Dak Lak.

Pâ dêi mâu vâi muăn ki kố ăm ’nâi, tơdroăng kố cho a 15h30 kơxê lơ 18/5,drêng 3 ngế muăn Mi, Hi ƀă Nhi lo a kơpong ki prâu gât dêi rơpŏng xah hêi ƀă ôh tá mơhúa mơnât lò gât tro rơlâm, tơhnong tâu a châ vâi muăn.

Drêng hlo ai tơdroăng mê, hên ngế dế pêi cheăng tung tíu ki prâu gât. Châ hlo mâu vâi muăn Mi, Hi, ƀă Nhi tro mơnât lò gât tâu, rêm ngế rĕng djâ mâu vâi muăn kố lăm hngêi pơkeăng kân kơpong Tây Nguyên pơlât, la xua tro rong râ, muăn Nhi ôh tá kâi tơkâ luâ; péa ngế muăn Mi ƀă Hi hiăng tơkâ luâ rôh ki rơ-iô ƀă dế châ pơlât a hngêi pơkeăng. Kŏng an tơring Krông Pač hiăng chu a pơlê vâ mơdât tơdroăng prôk lăm a tíu ki trâm xía vâ, tơkŭm séa ngăn, pêi pro mơnhên xiâm kối tơdroăng ga.

Gương tơplôu ƀă tơbleăng