VOV4.Sêdang - Kơxê lơ 29/3, a Hngêi hôp Kuô̆k hô̆i, Vi ƀan pơkuâ Kuô̆k hô̆i tơkŭm po Leh diâp Kỷ niệm chương pêi cheăng Kuô̆k hô̆i ăm mâu cheăng tung Kuô̆k hô̆i hneăng má 14. Jâ Nguyễn Thị Kim Ngân, Kăn xiâm hnê ngăn Kuô̆k hô̆i pơkuâ po rôh leh.

Diâp Kỷ niệm chương ăm mâu kăn Kuô̆k hô̆i hneăng má 14

Tơpui a rôh leh, jâ Nguyễn Thị Kim Ngân, kăn xiâm hnê ngăn Kuô̆k hô̆i ăm ‘nâi, kố cho rôh ki ai pơxúa khât vâ pơ-ôu pơ-eăng, chêh xo, khĕn kơdeăn mâu ivá veăng kum tơƀrê dêi mâu Kuô̆k hô̆i ƀă mâu tơdroăng cheăng dêi Kuô̆k hô̆i tung hneăng cheăng hdrối kố nah xuân môi tiah mâu hneăng hiăng vâ troh, veăng kum pơtối hnoăng cheăng 75 hơnăm mơjiâng ƀă mơnhông tơtêk dêi Kuô̆k hô̆i Việt Nam.

A rôh leh, pôa Trần Văn Túy, Kăn pơkuâ khu ki pêi hnoăng cheăng ối tung Vi ƀan pơkuâ Kuô̆k hô̆i hiăng pơchuât tơdroăng pơkâ dêi Vi ƀan pơkuâ Kuô̆k hô̆i ‘na tơdroăng ki diâp Kỷ niệm chương pêi cheăng Kuô̆k hô̆i Việt Nam ăm 472 ngế kăn Kuô̆k hô̆i hneăng má 14.

Katarina Nga tơplôu ƀă tơbleăng