VOV4.Sêdang - Kơxê hâi lơ 23/3, a Hà Nội, Đoân droh rơtăm Kŏng san Hồ Chí Minh dêi Khu xiâm pơkuâ Kŏng an tơkŭm po leh tơbâ 90 hơnăm Hâi mơjiâng Đoân droh rơtăm Kŏng san Hồ Chí Minh ƀă tơdah Mê dái Gak kring Tơnêi têa ối má péa. Xông tơpui a roh leh tơbâ, pôa Tô Lâm, Ngế xiâm ngăn ‘na Kŏng an pơkâ thế mâu râ xiâm Đoân ƀă đoân viên droh rơtăm tung Kŏng an kuăn pơlê kal hlê plĕng trâu hơngế, tŭm tơdroăng, hnoăng cheăng pêi cheăng Kŏng an; hlê plĕng pêi pro mâu pơkâ dêi Đảng vâ tơkŭm po mâu tơdroăng, mâu hnoăng  ki tơtro vâ mơhnhôk, mơnhông hnoăng djâ troăng ahdrối dêi rơxông ối nếo tung pêi pro tơdroăng ƀlêi trâng hnoăng cheăng kal kí, mơjiâng Đảng, mơjiâng khu Kŏng an kuăn pơlê krúa lĕm, ó rơdêi.

Klăng roh kố, teăng mâ khu râ kăn pơkuâ Đảng, Tơnêi têa, pôa Tô Lâm hiăng diâp Mê dai gak kring tơnêi têa ối má péa ăm Đoân droh rơtăm Khu xiâm pơkuâ Kŏng ai xua hiăng rơkê tung tơplâ ƀă hnê pơtâp hbrâ rơnáu tơplâ, kum tung tơdroăng mơjiâng ƀă gak kring Tơnêi têa Việt Nam xah hô̆i chuh ngiah.

Katarina Nga tơplôu ƀă tơbleăng