VOV4.Sêdang - Khế droh rơtăm hơnăm kố, Đoân droh rơtăm Kŏng ti ngăn on tơhrik Dak Lak hiăng pêi hên tơdroăng xua kuăn pơlê, môi tiah mơjiâng troăng kơxái hnhâng on tơhrik krâ pul on ăm bâ eăng troăng pơlê, hbru hnoăng liăn hriâm rơkê “Kum prôk troăng hngế” ăm mâu hok tro kơtiê ki mơ-eăm hriâm rơkê. Mâu tơdroăng pêi pro ki lĕm xua kuăn pơlê mê rế ton rế troh lâp lu tung kuăn pơlê, ai hên ngế veăng tung khu droh rơtăm mâu kơvâ cheăng, mâu tơring cheăm tung kong pơlê Dak Lak.

Drêng tơbâ hâi Mơjiâng Đoân droh rơtăm Kŏng san Hồ Chí Minh hâi lơ 26/3 kố nah, lối hrĭng ngế hok tro Hngêi trung râ má môi Nguyễn Đức Cảnh, cheăm Ea Ktur, tơring Čư̆ Kuin, hiăng hâk tơngăm veăng tung tơdroăng ki tối tơbleăng tơniăn ƀă tơ’noăng troăng xŏn xua Đoân Droh rơtăm kŏng ti on tơhrik Dak Lak tơkŭm po.

Droh rơtăm PC Dak Lak diâp liăn hriâm rơkê ăm o H’Mrin Ƀyă tá troh drêng hiăng klêi hriâm râ má péa

Akố, Đoân hiăng hbruô 20 hnoăng tơmeăm, tâi tâng kơnâ 10 rơtuh liăn ăm mâu hok tro kơtiê rơhêng vâ hriâm. Malối khu kố hiăng diâp 1 hnoăng liăn hriâm rơkê kơnâ 25 rơtuh 200 rơpâu liăn ăm o H’Mrin Ƀyă, kuăn ngo Rơđế, hok tro hriâm lâm 2, ai tơdroăng rêh ối xơpá xua kuăn tê ôh tá ai nôu. Liăn hriâm rơkê kố kô châ kum o tung hriâm tâp sap ing nôkố tá troh drêng klêi hriâm râ má péa. Xo liăn hriâm rơkê, o H’Mrin Ƀyă, ƀriê lo têa mâ tối:

“Mâu miê troh akố diâp ăm liăn hriâm rơkê mê á ro khât. Á kô mơ-eăm hriâm rơkê vâ xo ah hmôi chiâng ƀok thái pơkeăng”.

Tối ‘na tơdroăng kố, cô yăo Nguyễn Thị Phương, cô pơkuâ hngêi trung râ má môi Nguyễn Đức Cảnh, cheăm Ea Ktur, tơring Čư̆ Kuin, tối tiah kố:

“Á hlo tơdroăng ki diâp liăn hriâm rơkê ăm hok tro kơtiê hriâm rơkê cho tơdroăng ki ai pơxúa khât, ôh ti xê to kum mâu vâi o kơdroh iâ ki xơpá, mê ối veăng kum pro ai tơdroăng ki rơhêng vâ hriâm tâp tâ tung hngêi trung, kum mâu vâi o ‘nâi pâ nhuô̆m vâi pú, pâ nhuô̆m kuăn mơngế; pakĭng mê ối po rơdâ mâu ngế ki djâ troăng ahdrối ‘nâi mơ-eăm tung mơhriâm ƀă tung tơdroăng rêh ối”.

Droh rơtăm cheăm rơtế veăng  pro troăng bâ eăng a ƀuôn Pa, cheăm Čư̆ Prao, tơring M’Drak

Ngoh Hoàng Xuân Tứ, kăn phŏ pơkuâ ngăn Đoân Droh rơtăm Kŏng ti on tơhrik Dak Lak, ăm ‘nâi, kố cho rôh apoăng tiú pêi cheăng kố diâp liăn hriâm rơkê “tŏng kum o troh hngêi trung” ƀă rơhêng vâ kum mâu vâi o hok tro kơtiê ai hiâm mơno vâ mơ-eăm:

“Đoân droh rơtăm kŏng ti tung mâu hơnăm hdrối nah ai hên mâu tơdroăng pêi pro veăng kum rak ngăn ăm mâu vâi o hok tro kơtiê tơkâ luâ xơpá, môi tiah hbru tơmeăm, diâp ăm liăn, diâp ăm rơxế mái ƀă hên ki ê. Troh hơnăm kố, mê ƀă troăng hơlâ pơkâ hnoăng cheăng Đoân tung chal nếo mê ngin hiăng pơkâ troăng nếo tung hnoăng cheăng tŏng kum tung pơlê pơla, mê cho hơ’lêh sap ing tơdroăng ki diâp liăn hriâm rơkê bu cho tơdroăng ki pêi pro ahdrối tê hơ’leh sap ing tơdroăng ki diâp liăn hriâm rơkê tŏng kum vâi o.

Ngin loi tơngah kô ai mâu tơdroăng pêi pro ki hên tâ nếo ƀă tâi tâng mâu kăn ƀô̆ kŏng nhân viên tung kŏng ti ƀă mâu khu tơrŭm mâu ngế krê ki ê xuân veăng tơdjuôm ivá pêi pro mâu tơdroăng ki ai pơxúa môi tiah kố”.

Mâu tơdroăng cheăng ki lĕm xua tŏng kum pơlê pơla dêi mâu hơnăm ối nếo kơvâ on tơhrik hiăng tơdjâk troh khu droh rơtăm, mâu kơvâ cheăng, mâu tơring, cheăm ki ê tung kong pơlê Dak Lak

Rơtế ƀă tơdroăng ki diâp liăn hriâm rơkê ăm hok tro kơtiê, xuân tung khế droh rơtăm pơla hdrối kố nah, Đoân droh rơtăm on tơhrik Dak Lak hiăng pêi pro 2 to kế tơmeăm “krâ pul on bâ eăng a troăng thôn pơlê" a kơpong pro kăch măng nah ƀuôn Pa, cheăm Čư̆ Prao, tơring M’Drak ƀă thôn 1 cheăm Yang Reh, tơring Krông Bông.

2 to kế tơmeăm kố ai ki xŏn cho 3,2 km, tâi tâng kơnâ lối 60 rơtuh liăn, rơtế pêi pro ƀă droh rơtăm kơvâ on tơhrik ối ai tơdroăng ki veăng tơdjuôm ivá ƀă liăn ngân ƀă po rơdâ sap ing hên khu droh rơtăm a tơring, cheăm.Tiô pôa Trần Doãn Tới, kăn phŏ pơkuâ ngăn Đoân Droh rơtăm kong pơlê Dak Lak, mâu tơdroăng cheăng djâ troăng ahdrối dêi mâu hơnăm ối nếo kơvâ on tơhrik tung mâu hơnăm hdrối nah hiăng tơdjâk ăm droh rơtăm mâu kơvâ cheăng a mâu tơring, cheăm tung kong pơlê.

Rế hía rế ai tơ’nôm hên mâu kế tơmeăm “Bâ eăng troăng pơlê”, “Bâ eăng tơdroăng loi” djâ ăm mâu tơdroăng ki lĕm tro ăm mâu pơlê cheăm a kơpong hngế hngo:

“Ƀă tơdroăng ki veăng tơdjuôm ivá tŏng kum dêi Kŏng ti on tơhrik Dak Lak ‘na liăn ngân xuân môi tiah hâi pêi cheăng, rơtế amê cho dêi khu đoân viên, droh rơtăm lâp kong pơlê, hiăng veăng kum pro ai tơdroăng ki loi tơngah tung kuăn pơlê ƀă mâu rơxông hơnăm ối nếo. Tung pơla hdrối kố nah mê hiăng pro chiâng ivá, môi tơdroăng ki rơdêi khât tung đoân viên, droh rơtăm, tơdjuôm ivá mơjiâng thôn pơlê nếo”.

Kataria Nga tơplôu ƀă tơbleăng