VOV4.Sêdang - Tối ‘na tơdroăng rêh ối tung rơpŏng hngêi trâm hên xơpá la khu ki pleăng hnoăng tơná dêi mâu ngế hiăng pơtê xua hơnăm hiăng krâ, a pơlê kân Ea Sup, tơring Ea Sup, kong pơlê Dak Lak hiăng ai mâu tơdroăng pêi pro pơxúa kân khât tung hbrâ mơdât pơreăng COVID - 19. Ing mâu tơdroăng cheăng vâi pêi, tơdroăng tơrŭm môi tuăn châ mơhnhôk, ‘nâi hriăn plĕng, mơ-eăm tơplâ mơdât pơreăng tung kuăn pơlê châ tơ ƀrê tâ.

Jâ Đào Thị Màu a pơlê kân Ea Súp, tơring Ea Súp, kong pơlê Dak Lak tối ăm ngin tiah kố, ing mâu um tơvi, rơ’jiu, internet, ‘nâi kuăn pơlê a kơpong ki ai pơreăng dế trâm pá ôh tá ai kế kâ; Khu ki hbrâ mơdât pơreăng xơpá tơbrêi tơbrêh. Mê jâ veăng kum kế tơmeăm rế veăng kum hnoăng lăm mơhnhôk mâu rơpŏng ki chía niân, mâu rơpŏng ki tê mơdró tung kơpong veăng tơlo liăn, phái, mâu kế kâ vâ khu ki pleăng dêi hnoăng cheăng djâ hbru ăm mâu rơpŏng ki dế trâm xơpá tung kơpong ki klâ ối krê, ƀă mâu ngế ki plâ hâi plâ măng gak ngăn a tíu ki gâk.

Teăng mâ Khu ngăn mâu ngế hơnăm hiăng krâ pơlê kân Ea Súp pơcháu hngêi hơ-ui ăm rơpŏng kuăn pơlê a tơring Ea Súp

Jâ Màu xuân đi đo mơhnhôk, pơklât thế kuăn nê̆ng, mâu nhŏng o ki rêh ối a chê pêi pro kơtăng 5K:

“Tơmiât troh tơdroăng rêh ối drêng tơnêi têa dế trâm ƀă pơreăng xông tâ tú mê a tíu xiâm hbrâ mơdât: Ƀok thái pơkeăng, điều dưỡng, mâu ngoh kŏng an, mâu lêng. Á ai môi hiâm mơno, rơhêng vâ ăm tơ’nôm ăm mâu ngế ki mê mâu têa, môi kơthung xup kơxŏng khăng lơ môi kơthung têa ngeăm vâ mơhnhôk hiâm mơno. Á ôh tá ai tơmiât klâi, á bu rơhêng vâ pêi pro hên tơdroăng ki lĕm vâ kum ăm mâu nhŏng o mâu ngế ki lăm pêi dêi hnoăng cheăng hbrâ mơdât pơreăng vâi hmiân tuăn tâ”.

Pôa Phan Ba (ếo reăng) hbru tơmeăm ăm tíu gak, hbrâ mơdât pơreăng COVID-19 a tơring Ea Súp

Pôa Phan Ba, cho kăn ƀô̆ ki hiăng pơtê cheăng lối 5 hơnăm kố. Pôa Ba tối: “Đảng viên djâ troăng ahdrối - kuăn pơlê prôk tiô kơ’nâi’’. Ôh ti xê to tung rôh pơreăng COVID-19 tâ tú kố, mê hdrối mê, khu mâu ngế hơnăm hiăng krâ tŏng kum ivá a pơlê kân Ea Súp hiăng mơhnhôk veăng tơlo vâ mơjiâng pro 2 toăng hngêi tuăn hơ-ui ăm môi rơpŏng ki xơpá a cheăm tơkăng kong ƀă môi rơpŏng hdroâng kuăn ngo tung pơlê kân. Mâu hâi hdrối, pôa Ba ôh tá kho kong tô, kong mêi, mê pôa prôk lăm, djâ phái, kế kâ, têa ôu troh hbru ăm mâu kơpong klâ ối krê, mâu tíu gak ngăn mot lo.

“Hlo pơreăng tâ tú rơ-iô nếo tiah kố, hlê plĕng ‘na mâu tơdroăng “Môi chip drêng kơklêa, môi tơdrong drêng phâi”, xua mê nhŏng o ngin tơkŭm po môi khu ki pleăng dêi tuăn hiâm. Mê hmôu pơ mơhnhôk xêh mâu khu râ veăng tơlo kơxô̆ liăn a pơlê kân xuân môi tiah kơxô̆ ing mâu tơring, cheăm ki ê vâ veăng kum ăm mâu rơpŏng ki dế trâm pá a tơring. Ƀă mâu tíu gak séa ngăn hbrâ mơdât sap ing tíu tơkăng kong tá troh mâu tíu pêi cheăng a kơpong ăm thế klâ ối krê a tơring, pơlê kân. Ing mê ngin xuân hlo phâi tơtô môi iâ kum ăm mâu ngế kơtiê, mâu ngế xơpá tung pơla ai pơreăng môi tiah dế nôkố”.

Teăng mâ mâu ngế hơnăm hiăng hên pơlê kân Ea Súp hbru tơmeăm ăm kơpong klâ ối krê a tơring Ea Súp

Pơlê kân Ea Súp hiăng ai túa pêi pro ki tro ‘ló tung tơdroăng klâ ối krê mâu ngế ki pêi cheăng a Pơlê kong kân Hồ Chí Minh, ƀă mâu kong pơlê peăng Hdroh vêh a pơlê. Mê cho 4 troh 5 rơpŏng mơjiâng môi khu, vâi kum ăm môi toăng hngêi vâ mâu kuăn nĕng vêh rơtế dêi rơpó klâ ối krê. Kơnôm ing túa pêi ki kố mê mâu F0 rĕng châ ‘nâi ƀă ôh tá ăm tâ tú tung pơlê pơla. Mâu ngế hơnăm hiăng hên a pơlê kân Ea Súp hiăng veăng kum ai pơxúa tung hbrâ mơdât pơreăng a pơlê kân.

Pôa Nguyễn Thanh Bình, kăn hnê ngăn Vi ƀan pơlê kân Ea Súp, mơnhên tối:

“Ngoh Phan Ba, teăng mâ ăm mâu ngế hơnăm hiăng hên dêi tơring, tung pơla hdrối kố nah hmâ tơpui tơno ƀă râ Đảng, khu kăn pơkuâ tơring, xuân ai mâu ngế ki ai hiâm mơno hơ-ui pâ. Rế veăng kum tơlo ƀă khu pơkuâ Đảng, khu pơkuâ tơring pro môi toăng hngêi tơrŭm tuăn tung pơlê. Malối tung pơla achê kố ngoh Phan Ba ai hiâm mơno pêi pro tơdroăng tŏng kum, liăn ngân troh tơdroăng tŏng kum ăm pơlê kân vâ kơdroh iâ mâu tơdroăng ki xơpá dêi vâi krâ nhŏng o a kơpong ki ai pơreăng rôh kố”.

Lê Xuân Lãm chêh

Katarina Nga tơplôu ƀă tơbleăng