VOV4.Sêdang - Pơreăng kân Covid-19 hiăng tâ tú troh tâi tâng mâu tơnêi têa ƀă tung kơpong lâp plâi tơnêi, tơdjâk ó troh hên tơdroăng rêh ối- cheăng kâ dêi kuăn pơlê. Tung pơla mê, Đảng, Tơnêi têa Việt Nam ôh tá xê to tơmâng, rak tơniăn ăm kuăn pơlê tung tơnêi têa mê ối pêi pro teăm tơdrêng tung tơdroăng kring vế mâu rơpŏng kuăn pơlê Việt Nam ki rêh ối a kong têa ê.

Mơhé liăn ngân iâ, pá puât pơloăng mơnúa ối hên, tơnêi têa pin hiăng kum rơpâu ngế kuăn pơlê Việt Nam a kong têa ê tơniăn tơdroăng rêh ối, gak kring tŏng kum châ chăn, tơmeăm khoăng ƀă mâu hnoăng ki pơxúa ki tơxâng;  tơdrêng amê cho môi tung mâu kong têa tơkŭm po mâu roh tơƀai pơto djâ kuăn pơlê ki ai tơdroăng rêh ối pá puât, tơdroăng kal vâ thâ vêh tơnêi têa tơniăn lĕm, rơkê ƀă tơniăn tơdroăng hbrâ mơdât pơreăng châ tơƀrê. Xêo krê tung hơnăm 2020, Khu xiâm tơpui kâ hiăng tơrŭm mâu khu xiâm: Khăm pơlât, cheăng lêng, Kŏng an, troăng klông rơxế kơtâu ƀă mâu kong pơlê ki tơdjâk tơkŭm po lối 300 roh tơƀai kơneăng, djâ vâ chê 85 rơpâu ngế kuăn pơlê ing 59 kong têa, kơpong tơnêi tíu tung lâp plâi tơnêi vêh a tơnêi têa tơniăn lĕm. Pôa Phạm Bình Minh – Ngế pro xiâm phŏ hnê ngăn Chin phuh, Ngế xiâm tơpui kâ tối ăm ‘nâi:

“Tơdroăng ki kân má môi tung Covid 19 mê Việt Nam cho kơxô̆ ki iâ mâu kong têa ai mâu roh tơƀai djâ kuăn pơlê Việt Nam ki kreăng vêh tơnêi têa, mê cho  tơdroăng ki kal khât’’.

Kơxô̆ mơngế Việt Nam pêi cheăng a kong têa ê dâng lối 500 rơpâu ngế ƀă 100 rơpâu ngế hok tro lăm hriâm a kong têa ê. Mâu ngế kơdrâi Việt Nam xo kơnố a kong têa ê dâng lối 200 rơpâu ngế. Ƀă vâi krâ mâu hdroâng kuăn ngo, ki hên pêi cheăng a kong têa ê a mâu kong têa Sinuâ, Nhuk, Hàn Quốc, Saudi Arabia, Malaysia, Đài Loan, Hàn Quốc, Singapore, Libya, Trung Đông, Qatar, Kŏng hoa Cëzch ƀă hía hé. Hên ngế hiăng vêh a tơnêi têa, tung mê ki má môi cho roh tơƀai djâ kuăn pơlê Việt Nam ing kơpong xiâm pơreăng Vũ Hán – Sinuâ vêh tơnêi têa hâi lơ 10/2/2020.

Ƀă mâu kuăn pơlê xuân dế rêh ối, hriâm tâp ƀă pêi cheăng a kong têa ê, Khu xiâm tơpui kâ ƀă mâu kơ koan teăng mâ Việt Nam a kong têa ê đi đo tơpui tơno, thăm tơrŭm cheăng ƀă peăng kong têa ê, kơ koan cheăng a kong têa ê vâ tơniăn tơdroăng rêh ối, rak ngăn ivá châ chăn, hriâm tâp, pêi cheăng ƀă tơtro má môi ăm kuăn pơlê.

Ki má môi, môi tiah kong têa Nhuk – tíu ai hên ngế hdroâng kuăn ngo lăm hriâm tâp ƀă pêi cheăng, Kăn teăng mâ hiăng tơpui ƀă Tíu xiâm hnê mơhno dêi mâu kong pơlê, pơkâ thế vâi thăm pro tíu tơpui phôn ƀă nâl Xuăn.  Tơdroăng kố cho kal xua kuăn pơlê pin lối 200 rơpâu ngế cho lăm hriâm, tung mê, ai ngế hdroâng kuăn ngo lăm pêi cheăng, bu chiâng tơpui kâ iâ tê, tơpui  tơdroăng rêm hâi, tâng tro tâ pơreăng mê ôh tá chiâng vâ tơpui tối. Nôkố pơlê kong xiâm Tokyo ƀă vâ chê tơdế kơxô̆ kong pơlê hiăng mơdêk pro troăng phôn tơpui nâl Xuăn. Vâ chê 20 khu ngế Việt Nam a 20 kong pơlê dêi Nhuk tŏng kum ăm kơ koan teăng mâ tŏng kum pơlê pơla. Kăn ƀô̆, nhân viên dêi mâu Kơ koan teăng mâ Việt Nam a kong têa Nhuk hiăng kum rêm ngế môi hâi pêi cheăng vâ rôe kế tơmeăm kâ ăm mâu ngế kơtiê ôh tá ai ivá vâ rôe. Kô chiâng vâ tối, kố cho  tơdroăng ki lĕm mơhno tơdroăng tŏng kum dêi pó, khôi túa lĕm dêi mơngế Việt Nam pin. Pôa Vũ Hồng Nam – Kăn teăng mâ Việt Nam a kong têa Nhuk tối:

“Hơnăm 2020 cho môi hơnăm pá puât, sap ing apoăng ngin hiăng mơnhên tơdroăng tŏng kum kuăn pơlê cho kal khât, ngin mơnhên hnoăng ƀă tơnêi têa, ƀă kuăn pơlê, ƀă kum ngin tơkâ hluâ pá puât vâ pêi kêi đeăng hnoăng cheăng châ pơcháu”.

Tơdroăng kring vế tŏng kum kuăn pơlê Việt Nam a kong têa ê hiăng ƀă dế thăm pro loi tơngah dêi mâu ngế kuăn hơngế tơnêi têa mot tung mâu troăng hơlâ dêi Đảng ƀă Tơnêi têa; kum kuăn pơlê pin ki rêh ối a kong têa ê “phâi hơtô”, thăm nhuôm pâ ƀă tơmiât troh pơlê xiâm tơnêi têa. O Vũ Thị Tuyên, mơngế hdroâng kuăn ngo Thái a Bắc Quang, Hà Giang, dế hriâm tâp a kong têa Mih tối:

“Ngin o kok rôe vĕ tơƀai hiăng hên xôh, laga ôh tá chiâng vâ vêh a tơnêi Việt Nam, khéa ‘nâng laga xuân mơnê mâu xăng, mâu tăm kăn teăng mâ peăng kố, a kong pơlê kân Sanfrançico, Texas kum ngin o ti tăng mâu roh tơƀai kơneăng, ti tăng tíu ối kâ koi pơtê vâ ai ivá ti tăng mâu roh tơƀai kơneăng ki ê”.

Nôkố hên kong têa ƀă kơpong tơnêi tíu xuân dế kơdroh prôk lăm lơ klĭng péa mâu troăng tơƀai kơneăng lâp plâi tơnêi, ôh tá ăm mot lơ pơkâ séa ngăn mơ-éa môi tiah mơ-éa mơnhên ivá châ chăn pro hên tơmối tro kreăng a mâu tơraih tơƀai lâp plâi tơnêi. Vâ ví  tơdroăng ki kreăng môi tiah mê, pơchân tối kuăn pơlê Việt Nam tối tơdjuôm ƀă vâi krâ hdroâng kuăn ngo tối krê dế ối a kong têa ê kơdroh prôk lăm, ví tơdroăng ki tâ tú, pêi pro troăng hbrâ mơdât pơreăng tiô pơchân tối dêi kong têa ki dế rêh ối, đi đo séa ngăn ƀă châ ‘nâi mâu  tơdroăng rơxế kơtâi, troăng kơneăng lâp plâi tơnêi xuân môi tiah pơkâ ‘na mơ-éa ki kal vâ châ to tơƀai kơneăng vâ ôh tá ăm ai  tơdroăng ki kreăng a kong têa ê.

VOV4 chêh

A Sa Ly tơplôu ƀă tơbleăng