VOV4.Sêdang - Tung pơla sap ing khế 1 troh khế 3 hơnăm 2021, khu séa ngăn ‘na troăng prôk kong pơlê Gia Lai hiăng châ ‘nâi, pơxâu phak lối chât khu tơrŭm, mâu ngế krê pro xôi mâu tơdroăng pơkâ ‘na troăng prôk, pơto chơ tơmeăm, ƀă tâi tâng kơxô̆ liăn phak lối 300 rơtuh liăn.

Tung 3 khế apoăng hơnăm 2021, khu séa ngăn troăng prôk Gia Lai hiăng pơxâu lối 300 rơtuh liăn xua ai pro xôi drô troăng prôk

Ki nhên gá, tung hneăng cheăng séa ngăn, pơxâu phak xua pro xôi ‘na rak tơniăn a troăng prôk, khu ki séa ngăn dêi Khu ngăn troăng prôk ƀă rơxế kơtâu Gia Lai hiăng tơkŭm séa ngăn a 160 toăng rơxế, pơxâu phak liăn ƀă 22 khu tơrŭm, 40 ngế krê ƀă tâi tâng 209 rơtuh liăn, xo mơ-éa phêp vê rơxế ki ai hâi khế ƀă 9 ngế, xo 13 to inâi pơto, chơ hên luâ râ tơdroăng pơkâ, chơ tơmeăm tơkâ luâ peăng pa ngiâ, ôh tá ai inâi tiô pơkâ, kơto prôk mot a troăng mơdât ƀă hên ki ê.

Ƀă mâu kơvâ cheăng rơxế chơ tơmeăm a troăng prôk lơ chơ tơmối, ai 20/46 toăng rơxế tro séa ngăn ai pro xôi, ƀă tâi tâng kơxô̆ liăn phak vâ chê 100 rơtuh. Malối, tung pơla Têt Lo hơnăm nếo Tân Sửu, khu ki lăm séa ngăn hiăng châ rup ƀă pơkâ tơleăng 121 khu tong dêi mâu tơmối tối ‘na tơdroăng ki ôh tá hơ’leh, mơdrếo vĕ rơxế drêng ôh tá kơto vêh xua tơdjâk pơreăng COVID-19 a kong pơlê.

Nga tơplôu ƀă tơbleăng