VOV4.Sedang - Kơxê măng lơ 28/5, klêi kơ’nâi khăm ngăn, Tíu xiâm mơdât pơreăng dó inâi CDC Gia Lai châ hlo 1 ngế dương tĭnh ƀă SARS-CoV2 ai xiâm kối tâ tú ing Hà Nội. Ki nhên, kuăn pơlê L.H.L kot mâ hơnăm 1977, ối a Kông Chro, tơring Kông Chro, Gia Lai. Ngế ki kố hdrối mê hiăng cho F1 dêi ngế tro tâ Covid 19 kơxô̆ 5410. Klêi kơ’nâi ti tăng mơngế tro tâ pơreăng, CDC Gia Lai mơnhên 18 ngế cho F1 ƀă 95 ngế F2 dêi ngế tro tâ pơreăng kố.

Covid 19 a kong pơlê Gia Lai

Nôkố, mâu ngế ki kố hiăng châ klâ kơtăn tro tiô pơkâ; tơdrêng amê mâu tíu ki tơdjâk ngế ki tro tâ pơreăng kố hiăng klĭng péa, tĕm mơ-éa chêh tơbleăng ƀă châ xôh pơkeăng tiô pơkâ. Khu hnê mơhno hbrâ mơdât Covid 19 dêi kong pơlê Gia Lai pơkâ thế mâu kơvâ, kong pơlê mơdêk kơlo tơbleăng ƀă tơdroăng hbrâ mơdât pơreăng; pơtối pêi pro kơtăng tơdroăng séa ngăn, ti tăng mâu ngế ki vêh ing mâu kơpong tơ’lêi tâ tú pơreăng, mâu ngế rơkê, mâu ngế kong têa ê dế pêi cheăng tung kong pơlê, ai troăng khăm ngăn pơkuâ tơtro vâ mơdât pơreăng.

A Sa Ly tơplôu ƀă tơbleăng