VOV4.Sêdang - Tung rôh leh lơ 30/4 ƀă lơ 1/5, mâu kơvâ cheăng, tơring, cheăm tung kong pơlê Gia Lai pêi pro pơkâ ‘na tơdroăng ki ôh tá tơkŭm po mâu tơdroăng ki xah hêi, hơniâp ro, mâu tơdroăng cheăng tơkŭm hên ngế, pêi pro tro mâu tơdroăng pơkâ ‘na hbrâ mơdât pơreăng COVID-19.

Tâi tâng kơxô̆ tơmối ôm hyô a kong pơlê tung rôh leh tiô riân châ 23.370 ngế, tâk 2,9 hdroh tâng vâ pơchông ƀă hơnăm 2020; tâi tâng kơxô̆ liăn châ xo ing ôm hyô tiô riân châ 4 rơtal 500 rơtuh liăn, tâk 4 hdroh tâng vâ pơchông ƀă khế kố hơnăm 2020.

Tơdroăng cheăng tê mơdró a mâu hngêi ki ăm tơmối kâ koi, ối pơtê 1 – 4 to hơnglŏng, kơpong ối pơtê châ 90 – 100%. Tơmối lo ing mâu kong pơlê ki hên sap ing Pơlê kong kân Hồ Chí Minh, Hà Nội, Đà Nẵng, Bình Định, Dak Lak, Bình Dương. Tâi tâng kơxô̆ tơmối ối pơtê a mâu tíu ki ăm tơmối tiô riân châ dâng 1 rơpâu ngế, tâk 2,9 hdroh tâng vâ pơchông ƀă khế kố hơnăm 2020. Mâu Kŏng ti djâ tơmối ôm hyô ăm dâng 140 ngế tơmối.

Katarina Nga tơplôu ƀă tơbleăng