VOV4.Sêdang - Tây Nguyên dế mot tung rơnó tô  mơdrăng, khăng khoăng ton tung plâ pơla hdrối kố hía nah hiăng pro lối chât ha kong loăng a kong pơlê Gia Lai mơni kô tro on chếo kâ. Vâ hbrâ rơnáu tung hnoăng cheăng hbrâ mơdât on chếo kâ kong, mê  kong pơlê kố hiăng mơjiâng túa pơkâ, tơdrêng amê hnối tối tơbleăng tơdâng tơ’mô hên troăng hơlâ vâ hbrâ pêi pro tâng lơ trâm tơdroăng on chếo kong.

Kuăn pơlê a pơlê Đôč 1, cheăm Ia Kreng, tơring Čư̆ Pah xo rak ngăn vâ chê 700 ha kong sap ing Khu ki rak ngăn kong kơnhŏng têa Ia Ly. Mâu hâi mơ’nui khế 3, kong tô ton pro mâu tíu pêt kong akố huăn nhâ tơ’lêi tro on chếo kâ kong. Vâ hbrâ rơnáu tung hbrâ mơdât on chếo, pơlê Đôč 1 hiăng mơjiâng mâu khu rak ngăn, xing xoăng pro tíu gak, séa ngăn rak vế kong plâ hâi plâ măng. Malối, tíu pêi cheăng hiăng pơkâ túa vâ chôu hdrối ai pơkâ hên ha a mâu kơpong ki xiâm tơ’lêi tro on chếo.

Pôa Rơ Chăm Ho, ối a pơlê Đôč 1, cheăm Ia Kreng, tơring Čư̆ Pah, cho môi tung mâu rơpŏng ki xo rak ngăn kong ăm ‘nâi:

“Châ tơdroăng ki xing xoăng ăm mê ngin mơjiâng pro pŭn khu ki lăm pơtrui ngăn rêm hâi, kơhnâ veăng rak ngăn kong, tâng ai on chếo rĕng tơrŭm ƀă mâu khu môi tiah khu lêng ƀă kuăn pơlê dêi cheăm, kŏng an thôn, cheăm rĕng tơpâ on tiô túa ki rĕng má môi”.

Vâi krâ nhŏng o pơlê Đôč 1 trâ văng, chôu mâu hlá pê, nhâ răng vâ hbrâ mơdât on chếo kâ kong

Khu rak ngăn kong kơnhŏng têa Ia Ly dế rak ngăn lối 12.500 ha ki ai kong. Sap ing apoăng rơnó tô, tíu pêi cheăng kố hiăng xing xoăng kăn ƀô̆, mâu ngế cheăng đi đo lăm pơtrui ngăn, ối a kong, hbrâ rơnáu mơjiâng túa pơkâ 4 tơdrêng, tơdrêng amê hnối mơjiâng mâu khu, đô̆i hbrâ mơdât on chếo kong ƀă khu ki cheăng hiăng tâk troh lối hrĭng ngế.

Tíu pêi cheăng kố xuân hiăng tơbleăng mâu troăng hơlâ kih thuât môi tiah chôu mâu hlá pê, nhâ răng, pro troăng vâ mơdât on chếo a mâu ƀă tơnêi kong ki mơni kô tơ’lêi tro on chếo.

Pôa Phạm Thành Phước, kăn pơkuâ rak ngăn kong kơnhŏng têa Ia Ly, tơring Čư̆ Pah, Gia Lai ăm ‘nâi, maluâ, ki hên ƀăng tơnêi kong dêi tíu pêi cheăng ối tơprâ tơprŭng a hên tơring, cheăm, laga tíu pêi cheăng hiăng tơbleăng mâu túa pơkâ ki kal vâ hbrâ mơdât ƀă on chếo kong. Tung mê, ai môi iâ cho ivá veăng kum kân cho dêi vâi krâ nhŏng o tung tơdroăng ki tŏng kum trâ văng nhâ ƀă hbrâ mơdât on chếo kong.

“Ki xiâm dêi rơnó tô a Tây Nguyên cho ó khât, mơni on chếo kong drêng lâi ôh tá ‘nâi hdrối, xua mê, ƀă tâi tâng mâu kuăn pơlê, mâu rơpŏng kuăn pơlê ki ối achê kong ƀă hiăng kĭ tơkêa ƀă mâu khu tơrŭm ki ối pơkuâ a mâu tíu pêi cheăng ƀă mâu cheăm ki ai kong xing xoăng ăm mâu khu gak, séa ngăn drêng ai on chếo mê tơbleăng ăm kơbố, ƀă pêi pro mâu tơdroăng ki môi tiah lâi vâ rĕng châ hbrâ mơdât tơdrêng on chếo kong”.

Hoàng Qui chêh

Katarina Nga tơplôu ƀă tơbleăng