VOV4.Sêdang - Klêi kơ’nâi ai pơreăng kân COVID-19, kong pơlê Gia Lai hiăng pơkâ tơdroăng klâi vâ mơhnhôk ‘na ôm hyô ƀă tơdroăng po mơdĭng, po leh kân mơhno túa lĕm tro- tơ’noăng ivá sap nôkố ta troh mơ’nui hơnăm. Tơdrêng amê, mâu khu mơdró ‘na ôm hyô kong pơlê xuân ai hên troăng hơlâ vâ tơ’mot tơmối troh ôm hyô tung kong pơlê, pơtối tí tăng hriăn mơjiâng pro tơmeăm khoăng, ki pơxúa ‘na ôm hyô a kong pơlê.

Kố cho rôh má 2 ngoh Nguyễn Đình Đại, kot mâ hơnăm 1990, a bêng Đống Đa, Plei Ku rơtế ƀă dêi khu ai 5 ngế lăm ngăn xí K50, ối tung kơpong xiâm dêi Kơpong rak vế kong kế, nhâ loăng ki chiâng xêh Kon Čư̆ Răng, tơring Kƀang, kơtăn ing kơphô̆ ngo Plei Ku dâng 90 km. Tung rôh lăm ai 2 hâi, 1 măng a mơ’nui măng tĭng kố, khu mâu vâi pú pro hơkôp a hmốu ki kân, pôh kế kâ a chêng xí. Ôh tá ai hyôh phôn, ôh tá ai wifi, khu pú kố hơniâp ro tung tơdroăng ki lĕm dêi xí xŏn 54 met ƀă ai to kơbloh ki rơbông dêi xí, lăm mot ngăn a Kiâp vâi khĕn cho Hang Én, hum a têa ki drêh ngiât ƀă ngăn mâu to kong ki prôk tiô khu, mâu chêm kơneăng tơkâ luâ tâ tá xí.

Châ ối ƀă kong kế, piu lôi mâu tơdroăng ki tơbrêi tơbrêh tung rêh ối kum ngoh Đại hlo môi tiah hơniâp ro tâ klêi môi măng tĭng pêi cheăng tơbrê:

“Môi tiah hdrối nah á lăm gá tơpá vâ châ mot, xua tá hâi lĕm môi tiah nôkố, hên ngế tá hâi ‘nâi troh xí ki kố. La nôkố mê troăng prôk tung xí xuân tơ’lêi, tơmối tơ’lêi châ troh a xí. Tối ‘na xí 5K50 mê gá lĕm khât, á tá hâi hlo xí ki lâi lĕm môi tiah kố. Kơpong ki rak vế kong kế nhâ loăng ai pơtroh kăn ƀô̆ hnê ăm ngin lăm ƀă hnê túa ki lâi lăm tơniăn, kâ ối tiah lâi tơtro, krúa, pôi tá hvât xok hmâng vâ, vâ rak vế krúa lĕm kong prâi”.

Troh a xí K50, tơmối châ ngăn mâu kế tơmeăm, kuăn kiâ kong ki chêh xêh

Tiô pôa Phạm Hoàng Trực, kăn pơkuâ Kŏng ti Gotour Travel, pơlê kong kân Hồ Chí Minh, ôm hyô tiô dêi khu ki kŭn, dế cho tơdroăng klêi kơ’nâi ai pơreăng COVID-19. Xua mê, Kŏng ti xuân hmâ po mâu tour vâ tơmối ing Pơlê kong kân Hồ Chí Minh troh a Gia Lai vâ tí tăng ngăn mâu kuăn kiâ kong ki chiâng xêh tung Kơdrum kong têa ilâng tơnêi têa Kon Ka King (tơring ‘Mang Yang).

“A Tây Nguyên kố, troh a Kơdrum kong ilâng Kon Ka King, pin châ ối ƀă mâu khu chiu ‘ngré ‘ngró tung kong ƀă kong ilâng ki chiâng xêh vâ tơmối xup um. Pin chiâng vâ djâ mâu khu ki pêi cheăng, khu sinh viên lăm ngăn kong kế ƀă hên ki ê”.

Ngo nhâ khêi (tơring Đăk Đoa) bu kơtăn ing pơlê kong kơdrâm Plei Ku vâ chê 20km ai kong kế lĕm

Klêi kơ’nâi COVID-19, Kŏng ti um tơvi ôm hyô Le Plei Ku, troăng Phan Đình Phùng hiăng po hên tour lăm xah hêi, pro hơkôp, vo plong bu tung pơla 1 hâi, ƀă kơlo yă pá kơdâm 800 rơpâu liăn môi ngế. Ngoh Hoàng Phương, kăn pơkuâ kŏng ti ăm ‘nâi, yă rơpâ, hâi iâ, la tíu pêi cheăng kố xuân ối kơchuâ chêh tơdroăng ki vâ ăm tơmối rế lăm troh a hên tíu, rế lăm ngăn, rế châ mơnúa ‘na khôi túa lĕm tro dêi kong pơlê. Pakĭng mê, tíu cheăng kố ối tơkŭm tung mâu tour ki ê tí tăng ‘nâ kong kế:

“Nôkố peăng ngin tơbleăng 2 tơdroăng. Môi túa cho khôi túa lĕm tro tung pơlê. Má péa, cho mâu tour tracking. 3 túa tour hếo ngo Čư̆ Nâm 2 hâi môi măng, 3 hâi 2 măng mot tung xí Hang Én K50 kum ăm mâu ngế ki hâk vâ ƀă kong kế prôk tung kong, kâ tung kong, koi tung kong; tuor má 3 cho kong loăng hngó Hà Tam, kong loăng ki kân”.

Pôa Nguyễn Trọng Hải, kăn pơkuâ Kŏng ti tơlo liăn cheăng Cao Nguyên Việt (kong pơlê Gia Lai) ăm ‘nâi, sap ing apoăng hơnăm 2020, pơreăng COVID-19 tâ tú, khu mơdró kâ ‘na ôm hyô ôh tá ai tơmối kong têa ê ƀă tơmối tung tơnêi têa pin lăm ôm hyô. Xua mê, khu mơdró kâ tơtrŏng tâ tung mơnhông ôm hyô tung kong pơlê, ki xiâm cho ôm hyô châ mơnúa ngăn ƀă hơ’leh tơdroăng tơrŭm ƀă tíu rêh ối:

“Troăng nôkố cho vâ rơhêng vâ kơdĭng la châ achê ƀă kong kế hên tâ. Mâu tour ôm hyô ki iâ hâi ƀă ai hên tơdroăng ki rah xo ki phá tơ-ê dêi rơpó. Ôh ti xê ai tŭm tâi tâng môi tiah nah, ai hên tơdroăng ki ăm tơmối rah xo, thăm nếo ôh tá ai tơdroăng ki ôu kâ, lơ lôi to lâi hâi tung tour vâ tơmối châ free (hlâu hlĕng vâ tí tăng troh ngăn xêh) ƀă hên ki ê. Tơrŭm pơla kŏng ti ôm hyô ƀă mâu tíu ki rêh ối xuân ai tơdroăng ki hơ’leh. Á djâ tơmối troh a mâu homestay a mâu kơpong pơlê lơ a mâu farm house”.

Pakĭng mê, troh Gia Lai, tơmối ối châ hlo khôi túa ton nah ki lĕm tro dêi mơngế Bơhnéa, Jarai akố

Rơtế ƀă mâu khu mơdró kâ, apoăng khế 3/2021, Khu ngăn ‘na mơhno túa lĕm tro, tơ’noăng ivá ƀă ôm hyô Gia Lai hiăng ai túa pơkâ tơbleăng mâu tơdroăng pêi pro mơhno túa lĕm tro, tơ’noăng ivá ƀă ôm hyô sap ing nôkố troh mơ’nui hơnăm 2021. Tiah mê, kong pơlê kô pơtối tơkŭm po mâu tơdroăng mơdĭng, po kơchơ xiâm dêi kong pơlê môi tiah: Roh po kơchơ mơđah tê kế tơmeăm pêi lo ing chiâk deăng krúa tơrŭm ƀă khôi túa lĕm tro kế kâ (pơlê kong krâm Ayun Pa), Hâi mơdĭng Ôm hyô (tơring Kƀang), Tơkŭm po tŏn chêng koăng droh rơtăm – mâu phô̆m vâ xông kân, Măng tĭng Mơhno túa lĕm tro – Ôm hyô ƀă rôh po Festival chêng koăng Tây Nguyên (pơlê kong kơdrâm Plei Ku), Măng tĭng Reăng loăng karê trĭng (tơring Čư̆ Prông) ƀă hên ki ê.

Pôa Nguyễn Đức Hoàng, kăn phŏ pơkuâ Khu ngăn mơhno túa lĕm tro – Tơ’noăng ivá ƀă ôm hyô Gia Lai ăm ‘nâi:

“Pơtối tơbleăng mâu tơdroăng mơhnhôk tơmối ôm hyô a mâu pơlê kong kân môi tiah: Hà Nội, Pơlê kong kân Hồ Chí Minh; mơdêk tơrŭm ôm hyô ƀă mâu kong pơlê Bình Định, Phú Yên, Đà Nẵng, Quảng Nam, Kon Tum, Dak Lak; pơtối pro tơ’lêi hlâu ăm khu mơdró kâ veăng tung mơhnhôk ôm hyô, mơđah tơbleăng, veăng tung mâu khu famtrip”.

Hmâ ƀă tơdroăng ki nếo, mâu khu mơdró kâ tung kơvâ cheăng ôm hyô a Gia Lai dế rế hía rế hơ’leh, rơtế ƀă mê, kong pơlê xuân hiăng hbrâ mâu hlá mơ-éa ki kal vâ mơđah tơbleăng um méa, kuăn mơngế Gia Lai troh ƀă tơmối.

Nguyễn Thảo chêh

Katarina Nga tơplôu ƀă tơbleăng