VOV4.Sêdang - Kơxo lơ 2/4, Vi ƀan kong pơlê Gia Lai tơkŭm po Hneăng hôp mơ’no tơdrêng tung um tơvi mơgêi pơtân tơdroăng mơnhông cheăng kâ – rêh ối pơlê pơla, rak tơniăn gak kring cheăng lêng pái khế  apoăng hơnăm, pêi pro hnoăng cheăng pái khế pơtối dêi hơnăm 2021. Pái khế apoăng hơnăm 2021, mơhé trâm hên pá puât xua pơreăng COVID 19 xông tâ tú a mâu tơring tung kong pơlê, laga kong pơlê Gia Lai xuân mơ-eăm mơdât, kâi mơdât pơreăng.

Tung pái khế apoăng hơnăm 2021, pêi pro tơdâng tơ’mô “hnoăng cheăng péa xôh” rế mơdât pơreăng COVID 19 rế tơkŭm mơnhông cheăng kâ - rêh ối pơlê pơla, mơgêi rơnó Xeăng Tô hơnăm 2020 – 2021, lâp kong pơlê hiăng pêt lối 77 rơpâu ha loăng plâi tŭm túa. Pêi lo liăn ing pêi cheăng kơmăi kơmok 3 khế apoăng hơnăm 2021 châ lối 5 rơpâu 525 rơtal liăn. Tâi tâng kơxô̆ liăn mơ’no cheăng lâp pơlê pơla tung kong pơlê 3 khế apoăng hơnăm châ 13 rơpâu 996 rơtal liăn, châ 20% pơkâ.

Xuân tung pái khế apoăng hơnăm, kong pơlê kĭ pơkâ troăng hơlâ mơ’no liăn ăm 7 tơdroăng tơkêa bro ƀă tâi tâng kơxô̆ liăn kĭ 1 rơpâu 988 rơtal liăn ƀă ai 220 khu tê mơdró, 48 khu cheăng châ mơjiâng nếo.

A Sa Ly tơplôu ƀă tơbleăng