VOV4.Sêdang - Ngăn tiô pơkâ dêi Ngế xiâm ngăn ‘na hnê hriâm ƀă hnê mơjiâng tuăn ngôa rơkê ‘na tơbleăng pơkâ tơ’noăng râ má pái phôh thong, Vi ƀan kong pơlê Gia Lai hiăng môi tuăn kĭ pơkâ ‘na tơdroăng tơkŭm po tơ’noăng râ má pái phôh thong hơnăm 2021. Vi ƀan kong pơlê Gia Lai pơkâ Kăn pơkuâ hnê hriâm ƀă hnê mơjiâng tuăn ngôa rơkê tơrŭm ƀă mâu khu cheăng, kơvâ cheăng pêi pro tơkŭm po hneăng tơ’noăng râ má pái phôh thong hơnăm 2021 tơniăn, kơtăng, tro tiô pơkâ, ki má lối cho rak tơniăn tung pơla ai pơreăng COVID 19.

Hneăng tơ’noăng râ má pái phôh thong hơnăm kố kô tơkŭm po tung 2 hâi, lơ 7 ƀă lơ 8, ƀă 5 ƀai tơ’noăng ai: 3 ƀai krê cho Toán, Ngữ văn, nâl kong têa ê ƀă 2 ƀai tơ’'noăng tơdjoâm Khoa học tự nhiên, Khoa học xã hội. Mâu tiú ki tơ’noăng tung kong pơlê Gia Lai kô pơxiâm tơdah hô sơ dêi hok tro sap hâi lơ 27/4 ƀă mơgêi a 5 chôu kơxê lơ 11/5/2021.

A Sa Ly tơplôu ƀă tơbleăng