VOV4.Sêdang - Hâi lơ 31/3, Tiú xiâm ngăn pơkeăng Ia Grai, kong pơlê Gia Lai pêi pro tơdroăng klâ krê 1 ngế kơnốu ki kơtâu lo ing kơpong klâ krê tơchoâm a kong pơlê Lạng Sơn vêh a kong pơlê. Tiô tối tơbleăng ing Tíu xiâm Séa ngăn mơdât pơreăng kong pơlê Gia Lai, hâi lơ 14/3, Ngế rơtăm inâi cho Nguyễn Công Giá (kot mâ hơnăm 2000, ối a thôn Văn Yên, cheăm Ia Yok, tơring Ia Grai) châ klâ krê tơchoâm a Tiú xiâm Kuân đoân Chi Lăng, kong pơlê Lạng Sơn.

Akố, gá hiăng châ vâi xo ngăn mơheăm 1 hdrôh ƀă ăm hlo âm tĭnh. Troh kơmăng lơ 23/3, mơhé hâi tâi hâi pơkâ klâ krê tiô tơdroăng hiăng pơkâ hdrối, la ngoh Giá xuân ối lo kơtâu hdâ ing kơpong klâ krê, klêi mê tât rơxế ing Lạng Sơn vêh troh a tơraih rơxế Mỹ Đình (Hà Nội), ối a Hà Nội 2 hâi, klêi mê pơtối kơto rơxế vêh troh a Gia Lai.

Tiú xiâm ngăn pơkeăng pơlât tơring Ia Grai hiăng khăm hlối ăm ngoh Giá klâ krê, hlối tơbleăng ăm Tíu xiâm seá ngăn mơdât pơreăng kong pơlê Gia Lai vâ khăm ngăn xo mơheăm.

Gương tơplôu ƀă tơbleăng