VOV4.Sêdang - Lối hrĭng ngế kăn ƀô̆ ngăn pơkeăng ƀă khăm pơlât, kŏng an ƀă lêng ối tung Khu hnê mơhno cheăng hbrâ mơdât pơreăng COVID-19 Gia Lai hiăng pêi pro tơdrêng tơdroăng ki klâ xoăng, klâ krê lối rơpâu ngế kuăn pơlê vêh sap ing kơpong ki ai pơreăng Pơlê kong kân Hồ Chí Minh, klêi kơ’nâi pơlê kong kân kố pêi pro tơdroăng ki klâ krê pơlê pơla. Tơdroăng ki xing xoăng klâ krê cho sap ing 2 chôu kơxo má lơ 31/5.

Tiah mê, khu hnê mơhno cheăng hbrâ mơdât pơreăng COVID-19 Gia Lai hiăng pơkâ thế lối 1.500 ngế lối 53 toăng rơxế ƀă 116 ngế a môi rôh kơneăng sap ing Pơlê kong kân Hồ Chí Minh vêh pơlê kong kơdrâm Plei Ku pêi pro tơdroăng ki lăm chêh tối dêi ivá. Klêi kơ’nâi séa ngăn, 667 ngế châ pâk xo mơheăm séa ngăn COVID-19, 133 ngế châ djâ ăm ối krê tơkŭm a tơring Đức Cơ. Mâu tơmối ki u ối kô klâ krê a hngêi, ai tơdroăng ki séa ngăn dêi khu kăn pơkuâ tung kong pơlê.

Pakĭng tơdroăng ki séa ngăn tơmối a tơraih tơƀai, tâi tâng mâu tơraih rơxế tung kong pơlê Gia Lai pơkâ thế mâu rơxế tối tơbleăng tơdroăng, séa ngăn ing mâu camera séa ngăn a mâu rôh vêh ing Pơlê kong kân Hồ Chí Minh vâ hbrâ mơdât pơreăng. Kong pơlê hiăng pro 4 tíu séa ngăn pơreăng a mâu troăng kân kơxô̆ 14, 19 ƀă 25 ki mot tung kong pơlê sap ing 12 chôu măng dế lơ 31/5, séa ngăn ƀă pơtối klâ xoăng mâu rơxế ki vêh ing Pơlê kong kân Hồ Chí Minh.

Katarina Nga tơplôu ƀă tơbleăng