VOV4.Sêdang - Kơ’nâi lối 3 hơnăm pêi pro tiô kơxô̆ 12 dêi Khu kăn Đảng kong pơlê Gia Lai ‘na mơjiâng  thôn pơlê nếo a kơpong hdroâng kuăn ngo, ngiâ méa dêi hên pơlê hiăng xông tơtêk khât. Tung 3 hơnăm hdrối, lâp tung kong pơlê hiăng ‘no vâ chê 1 rơpâu rơtal liăn vâ mơjiâng thôn pơlê nếo tung hdroâng kuăn ngo, kơnôm ing mê, hên pơlê hdroâng kuăn ngo hiăng châ tơtêk rĕng ƀă hiăng hlo nhên ki tơƀrê mê.

Hiăng lối 2 hơnăm tơkâ la mâu kuăn pơlê a pơlê Sơn, cheăm Ia Nan, tơring Đức Cơ, kong pơlê Gia Lai ôh ti kâi piu hâi ki vâi tơdah xo inâi pơlê thôn pơlê nếo. Mê cho tơdroăng ki vê hdró mơhno tối ăm mâu ivá mơ-eăm dêi khu Đảng, khu kăn pơkuâ ƀă kuăn pơlê a kơpong tơkăng kong ai hên tơdroăng ki xơpá ƀă tơdroăng ki mơ-eăm cho ing 5/19 tơdroăng pơkâ thôn pơlê nếo.

Pôa Siu Bình, krâ pơlê tối: “Mơjiâng thôn pơlê nếo cho vâ kuăn ‘nĕng cháu chái ai tíu ki lĕm krip, ai plông kơtu ƀa ong, mâu troăng prôk ki châ  ok ƀê tong  krúa ƀă hên ki ê. Pro ăm pơlê pin lĕm xuân cho veăng kum mơjiâng tíu tơkăng kong lĕm, kro”.

Thôn pơlê nếo a cheăm Ia Dom, tơring Đức Cơ, Gia Lai

Mâu tơdroăng tơmiât môi tiah tơ’lêi hlâu mê la ‘măn chôu ivá mơ-eăm dêi mâu kuăn pơlê kơpong tơkăng kong. Xua mê, kuăn pơlê a pơlê Sơn mơhnŏng pleăng xêh lối met karê tơnêi, veăng kum 200 rơtuh liăn rơtế ƀă lối hrĭng hâi vâ tơdjuôm ivá mơjiâng thôn pơlê nếo. Troh mơ’nui hơnăm 2018, pơlê Sơn chiâng pơlê thôn pơlê nếo ki apoăng a tíu tơkăng kong dêi kong pơlê.

Sap ing pơlê Sơn, troh nôkố, cheăm Ia Nan ai tơ’nôm 3 to pơlê pêi klêi thôn pơlê nếo. Ƀă môi tiah môi to um ki tơdjâk, troh nôkố, a mâu cheăm tơkăng kong mê cho: Ia O, Ia Chía, tơring Ia Grai, Ia Dom, Ia Nan, tơring Đức Cơ hiăng ai troh 17 to pơlê hdroâng kuăn ngo pêi klêi thôn pơlê nếo.

Cheăm Ia Chía ai 10 to pơlê mê hiăng ai troh 5 to pơlê pêi klêi thôn pơlê nếo. Pôa Rơ Châm Hí, krâ pơlê Kom Ngo ăm ‘nâi: “Pơlê ai 221 rơpŏng ƀă lối 1 rơpâu pơ’leăng mâ mơngế, kơxô̆ rơpŏng kơtiê châ 4,1. Tâng môi tiah hơnăm 2016, pêi lo liăn rêm ngế bu 16 rơtuh liăn tung môi mê nôkố hiăng tâk lối 41 rơtuh liăn.

Hŏng tơdroăng mơjiâng thôn pơlê nếo, kế tơmeăm khoăng ‘no liăn mơjiâng pro tơdâng tơ’mô, kuăn pơlê ôh tá tơkôm xếo tung tơdroăng ki tŏng kum dêi tơnêi têa”.

Xuân môi tiah mê, pơlê Mook Trêl, cheăm Ia Dom, tơring Đức Cơ hiăng hơ’lêh hên khât. Kdor Bia, kăn pơkuâ thôn tối: “Kuăn pơlê tung pơlê đi đo mơ-eăm tơkâ luâ xơpá vâ mơjiâng thôn pơlê nếo. Pakĭng tơdroăng tŏng kum dêi tơnêi têa, kuăn pơlê ối veăng kum liăn ƀă hâi pêi cheăng vâ pro troăng mot tung thôn, troăng lăm kơpong cheăng kâ. Rơtế amê, hngêi trung mầm non châ ‘no liăn pro, pêi lo liăn rêm ngế châ 41,1 rơtuh tung môi hơnăm”.

Tiô riân ngăn, vâ mơjiâng 17 to pơlê thôn pơlê nếo tung kơpong hdroâng kuăn ngo a mâu cheăm tơkăng kong, kuăn pơlê hiăng veăng kum lối 3 rơtal liăn ƀă lối rơpâu hâi pêi cheăng.

Diâp ƀâng mơnhên “Pơlê pêi plah thôn pơlê nếo” a Gia Lai

Pôa Nguyễn Ngọc Phận, kăn phŏ hnê ngăn Vi ƀan tơring Đức Cơ ăm ‘nâi, Tơdroăng mơjiâng thôn pơlê nếo bu ai tíu ki pơxiâm mê ôh ti xê tíu ki mơgêi. Xua tơdroăng ki kal dêi tơdroăng cho mơdêk tơdroăng rêh ối dêi kuăn pơlê, tăng cheăng pêi ƀă mơjiâng pro hngêi trăng troăng klông hiăng klêi a tíu tơkăng kong ôh tá la lâi pơtê dêi khu pơkuâ Đảng, khu pơkuâ tơring, cheăm ƀă tâi tâng kuăn pơlê.

Tiô tơdroăng pơkâ kơxô̆ 12 – CT/TU dêi Khu pơkuâ ngăn Đảng kong pơlê Gia Lai “ ‘Na mơdêk tơdroăng ki pơkuâ dêi khu râ Đảng rêm râ ‘na mơjiâng thôn pơlê nếo tung hdroâng kuăn ngo”. Tung tơdroăng ki mê, Khu ngăn chiâk deăng ƀă mơnhông thôn pơlê kong pơlê Gia Lai hiăng mơjiâng “Khu xiâm pơkâ tơdroăng mơjiâng pơlê thôn pơlê nếo”, tơdrêng amê hnối hnê mơhno mâu tơring, cheăm tung kong pơlê tơbleăng. Khu pơkâ tơdroăng tung mê ai 5 khu cho: túa pơkâ; hngêi trăng, troăng klông cheăng kâ rêh ối pơlê pơla; cheăng kâ ƀă tơkŭm pêi cheăng kâ; mơhno túa lĕm tro pơlê pơla - kong prâi tơnêi tíu; tơdroăng kal kí – gâk kring pơlê pơla cheăm bêng.

Tung hlá mơ-éa ki hnê mơhno, Vi ƀan hnê ngăn mâu tơring, pơlê kong kơdrâm pêi pro klêi tơdroăng pơkâ pơlê thôn pơlê nếo. Troh nôkố, mâu tơring, pơlê kong krâm, pơlê kong kơdrâm tung kong pơlê Gia Lai hiăng châ khu pơkuâ tơdroăng pơkâ mơnhên tối túa pơkâ kong pơlê tung tơdroăng 5 khu pơkâ, khu pơkuâ nhên, mơni kô ai sap ing 15 troh 19 tơdroăng pơkâ tơtro ƀă tơdroăng dêi kong pơlê.

Klêi kơ’nâi 3 hơnăm tơbleăng pêi pro pơkâ kơxô̆ 12-CT/TU hâi lơ 13/2/2018 dêi Khu pơkuâ ngăn Đảng Gia Lai ‘na mơdêk pơkuâ dêi khu râ Đảng rêm râ ‘na mơjiâng thôn pơlê nếo tung hdroâng kuăn ngo, troh nôkố, lâp kong pơlê ai 83 to thôn, pơlê pêi klêi thôn pơlê nếo.

Tung 3 hơnăm hdrối nah, lâp kong pơlê hiăng ‘no lối 875 rơtal liăn vâ mơjiâng thôn pơlê nếo tung kơpong hdroâng kuăn ngo. Tung mê, liăn tơnêi têa ƀă liăn kong pơlê lối 766,3 rơtal liăn; liăn râ tơring lối 44,9 rơtal; liăn cheăm lối 12,6 rơtal; kơxô̆ liăn khu mơdró kâdâng 21,2 rơtal liăn; kuăn pơlê veăng tơlo lối 93,6 rơtal liăn; kơxô̆ liăn ki ê lối 37 rơtal liăn.

Pakĭng mê, mâu tơring, cheăm hiăng mơhnhôk châ 36.551 hâi pêi cheăng ƀă 86.813 met karê tơnêi vâ pro troăng prôk tung thôn, pro kuât mơhno túa lĕm tro, hngêi ối rơtế ƀă mâu kế tơmeăm xúa tơdjuôm ki ê.

Hlá tơbeăng Gia Lai

Katarina Nga tơplôu ƀă tơbleăng