VOV4.Sêdang - Vi ƀan hnê ngăn kong pơlê Gia Lai nếo ai tơdroăng pơkâ Túa mơjiâng pro Hngêi pơkeăng lêng pơlât ăm mâu ngế ki tâ pơreăng COVID-19, tung pơla pơreăng COVID-19 tâ tú rơ-iô ôh tá tơniăn. Tiah mê, Hngêi pơkeăng lêng pơlât mâu ngế ki tâ pơreăng COVID-19 kơxô̆ 2 kong pơlê Gia Lai châ mơjiâng pro a Hngêi trung Kao đăng Gia Lai – tíu má 2, a pơlê kong kơdrâm Plei Ku chiâng ‘măn dâng 400 – 800 to xoăng koi pơlât.

‘Mâi rơnêu ƀă ăm xúa hngêi pơkeăng pơtân kơxô̆ 2 a Plei Ku

Mâu ngế ki pơlât cho mâu ngế ki klêi kơ’nâi séa ngăn yương tĭnh ƀă SARS-CoV-2 la ôh tá hlo tơngê, kơ-o, lơ tơngê, kơ-o la bu iâ tê, pơlât mâu ngế ki tâ COVID-19 ki ôh tá râ ƀă ai pơreăng châi tung châ ƀă mâu ngế ki vêh tâ pơreăng nếo. Hngêi pơkeăng châ ‘mot 80 ngế, hbrâ rơnáu 71 túa kế tơmeăm khăm pơlât, pơkeăng. Vi ƀan hnê ngăn kong pơlê pơcháu ăm Tíu xiâm khăm pơlât pơlê kong kơdrâm Plei Ku pôu râng tơdroăng ki tơdah xo, pơkuâ Hngêi pơkeăng lêng pơlât mâu ngế ki tâ pơreăng COVID-19 kơxô̆ 2.

Katarina Nga tơplôu ƀă tơbleăng