VOV4.Sêdang - Sap ing hâi lơ 27/5 nah troh nôkố, a kong pơlê Gia Lai ai 4 tíu ki ai pơreăng êi kéa a kơpôu, ro ƀă vâ chê 70 to a 3 tơring ‘Mang Yang, Čư̆ Sê, Đăk Đoa ƀă dế mơni kô tâ tú tung lâp lu. Nôkố, tâi tâng mâu kơpôu, ro dêi kong pơlê Gia Lai ai lối 435 rơpâu to, cho hên má 2 tung lâp tơnêi têa; ki hên cho păn iâ, ‘ngré, kơpong hdroâng kuăn ngo.

Tơdroăng ki hbrâ mơdât pơreăng, rak ngăn tâi tâng ăm mâu kơpôu, ro ai pơxúa khât tung mơnhông cheăng kâ dêi kuăn pơlê. Xua mê, Vi ƀan hnê ngăn kong pơlê Gia Lai hiăng ai hlá mớ-ea pơtroh tơdrêng ‘na tơdroăng ki tơbleăng troăng hơlâ hbrâ mơdât pơreăng êi kéa a kơpôu, ro a kong pơlê.

Gia Lai: mơni pơreăng êi kéa a kơpôu ro kô tâ tú tung lâp lu 

Tiah mê, Vi ƀan hnê ngăn kong pơlê Gia Lai pơkâ thế mâu tơring, cheăm ƀă kơvâ pêi chiâk deăng pêi pro kơtăng mâu troăng hơlâ hbrâ mơdât tâ tú, roê vaccine pâk ăm kơpôu ro, pêi pro tơdroăng tŏng kum ƀă prâu tah mâu kơpôu, ro ki tro pơreăng, séa ngăn kơtăng mâu kơpôu, ro vâ hbrâ mâu túa pơkâ hbrâ mơdât.

Katarina Nga tơplôu ƀă tơbleăng