VOV4.Sêdang - Kơhâi dế lơ 5/8, môi ngế kơdrâi mơ-êa tro tâ COVID 19 a kong pơlê Gia Lai hiăng châ mâu ƀok thái pơkeăng tŏng kum pâ xo kuăn tơniăn. Ƀok Thái pơkeăng Nguyễn Tấn Phúc – Kăn pơkuâ Hngêi pơkeăng pơlât mơngế tro tâ COVID 19 kong pơlê Gia Lai tối ăm ‘nâi, ngế tro tâ pơreăng má 109.113 ing kơpong ai pơreăng vêh a pơlê, châ hlo tro tâ COVID 19 ƀă mot pơlât a hngêi pơkeăng sap ing hâi lơ 31/7.

Ngế kơdrâi mơ-êa tro tâ COVID 19 mơhum kuăn tơniăn lĕm

Tung lối 1 măng tĭng pơla kố nah, ngế tro tâ pơreăng châ kơjo séa ngăn ivá khât păng 'nâng xua hiăng vâ troh hâi mơhum. Kơxo lơ 5/8, ngế tro tâ pơreăng kố hiăng vâ mơhum kuăn ngá, hngêi pơkeăng hiăng krếo mâu ƀok thái pơkeăng pâ pơlât dêi Hngêi pơkeăng kân kong pơlê Gia Lai tŏng kum. Mâu ƀok thái pơkeăng hiăng pâ xo kuăn ngá tơniăn lĕm, kuăn ngá kơdrâi hngăm 3,8 kilô.

Nôkố, hngêi pơkeăng hiăng ăm môi ngế thái pơkeăng rak ngăn krê ăm ngế kơdrâi ki nếo mơhum kuăn ngá ƀă kuăn ngá mê, tơniăn hbrâ mơdât tâ tú ăm dêi pó.

A Sa Ly tơplôu ƀă tơbleăng